Aizawl January 7, 2024 : Sawrkar tharin healthcare bill tang pek tur Rs. Vbc. 40 a ruahman chu finance department lamah a la thang mek ni a thudawn a ni a. Hetihlai hian tun dinhmunah Rs. Vbc. 57 bawr vel health care bill tang a awm mek.

ZALEN thudawn danin, Mizoram sawrkarin healthcare bill mipui hnena pek chhuah tur Rs. Vbc. 40 a ruahman tawh chu dan angin finance department-ah tihfel ngaite tihfel mek a ni a, chumi hnuah bill hi pek chhuah a ni ang.

Mizoram State Healthcare Society thawktute sawi danin, tun dinhmuna healthcare bill pek chhuah tur an pass zat chu Rs. Vbc. 57 a ni a, heng bakah hian bill tang tlem azawng awm bawkin, bill tang zawng zawng hi Rs. Vbc. 60 chuang hret a nih rin a ni.

Chief Minister Lalduhoma hovin December 11, 2023 khan Finance Department leh Planning & Programme Implementation department hotute an thukhawm a, sawrkar policy-in a huam thlai palite leina tur Rs. Vbc. 110 ruahmanin, healthcare bill tang pek tur Rs. Vbc. 40 a ruahman bawk.