January 8, 2024; HSRP hmang tura hriattirna (public notice) chu ni 11.5.2023 ah tihchhuah a lo ni tawh a, he hriattirna ngaipawimawh lo leh zawm duhlote chungah chuan dan anga hmalak zel tawh tur a ni.

Sr. SP, Traffic, Aizawl in thuchhuah a siam a tarlan a nih danin, HSRP ah information hrang hrang, chassis number, engine number etc. dah a ni a, heng information te hi lirthei registration certificate a information nen a inmil thlap tur a ni a, a eng emaw ber inanglo a awm chuan thil diklo awlsam takin a hmuhchhuah theih nghal zel a ni.

Lirthei neituten HSRP nilo, an duh ang leh mawi an tih zawng an vuah thin hian lirthei rutu tan number plate dang bel chawp theihna kawng zau takin a hawnsak tih thuchhuah ah chuan tarlan niin, chhui zui ngaihna awm lova bo hlen ta a tam nia tarlan a ni bawk.

HSRP hi lirthei neituten an hman vek hunah lirthei rukte chu a tlanna chin leh a kalna lam hawi awlsam taka chhuizui nghal theih a ni dawn a, mipui/lirthei neituten HSRP vuahlo reng reng te chu rukbo rinhlelhawm a ni tih an hriat nghal mai theih nan HSRP hman hi a pawimawhzia hre thar chunga hmang theuh turin ngen an ni.