Himachal Pradesh state assembly inthlana an chak hnuah Congress chuan chief minister tur an la tifel thei lo va, inchuhna boruak lian tak a awm mek nia sawi a nih karah chuhtu langsar, an Congress President Pratibha Singh chu a ni dawn lo tih a chiang tawh nia sawi a ni.

Ningani tlai khan Congress hi chief minister tur sawihovin an thukhawm a, a hma lawkin Singh-i hian Delhi-a an hotute hriat turin an state-a chanvo sang ber chelh a duh thu a sawi.

Inthlan chu nikuma a pasal thi ta, Virbhadra Singh hminga chuha hnehna an chan thu a sawi a, an chhungkua hlamchhiah an nih chuan ‘chhiatna’ a nih tur thu a sawi.

Hetih lai hian Singh-i hi an MLA thlan thar 40 zingah a tla na lem lo nia sawi a ni a, inthlan a chuh loh chhan pawh kha nia sawi a ni.

State chief hlui, Sukhvinder Singh Sukhu chu an MLA zinga 25-in an thlawp nia sawi a ni a. Term liam chiaha  Congress Legislature Party hruaitu, Mukesh Agnihotri pawh sawi rik rin pawl a ni.

Sukhu hi Hamirpur district-a Nadaun bial atangin MLA-ah vawi thum thlan tlin tawh a ni a. Dan hre mi niin Congress zirlai pawl, National Student Union of India (NSUI) atanga lar chhuak a ni.

Himachal Pradesh University, Shimla-a a kal lai atanga lar tawh niin a zir chhuah hnuah politics a khel zui a, an state-ah hian Youth Congress president pawh a ni tawh.

Agnihotri hi chanchinbumi thin niin kum 20 liam tawha politics a zuan luh atangin vawi nga thlan tlin a nihna a ni tawh a. Chief minister nih tum chungchang engmah a la sawi lo va; mahse, Virbhadra Singh-a hnung zuitu \hin a ni thung.