Health Minister hmalakna in tun hnai khan Assembly Conference Hall-ah MLA-te pualin tunlaia Mizoramin natna kan hmachhawn lian zual pathum HIV/AIDS, Cancer leh COVID-19 chungchanga Mizoram dinhmun inhrilhfiahna hun buatsaih a ni a. Heng natna hrang hrang te zingah hian HIV/AIDS leh Cancer hian min tibuai zual a, a bikin HIV/AIDS hi nasa taka a darh mek avangin tih tak zeta kan buaipui a hun ta hle.

HIV/AIDS kaidarhna ber chu mipat hmeichhiat leh ruihhlo ah te a ni a. HIV/AIDS hi Mizoramah kum 1990 atangin test neih a ni a, tun thlengin he natna vei mi 21538 hmuhchhuah tawh an ni a, heng zing 1826 hi nu naupai an ni. AIDS vanga thi 2539 an awm tawh bawk a ni. Puitling kum 15 leh 49 inkar zinga AIDS vei hmuhchhuah ah Mizoram a sang ber a 2.04 % niin national average hi 0.22 % a ni a, HIV kai thar tamna ber Mizoram niin 1.32% a ni a, hetih lai hian national average chu 0.07% a ni. India ram pumah HIV kai thar 27% a an tlakhniam laiin Mizoramah erawh 18% in a sang thung a ni.

HIV/AIDS hian kan ram hi a chiah hneh tawh hle tih a chiang a, kan chhungkua hi fihlim mah ila kan thenawm leh kan kawtkai maiah he natna hi a awmin min chenchilh reng tawh tih a chiang hle. Tun hnaia MJA hruaitu ten district hrang hranga damdawiin an tlawhna ah district tinin HIV/AIDS chu an buaipui thu leh a vei an tam thu an sawi vek mai a, chuvangin awm mai mai theih a ni ta lo a, kan zavaia kan tanrual a hun ta hle mai.

HIV/AIDS chungchangah hian sawrkar, kohhran leh tlawmngai pawlte pheikhai rual taka an tanho a pawimawh hle mai a. Kohhran pawhin tun aia nasa zawka an do a, Pulpit thlenga auchhuahpui a hun ta hle mai. Chutiang zelin tlawmngai pawl te pawhin an meber te ah he natna hlauhawmzia an puan tam a, inven a pawimawh zia an zirtir tam a hun ta hle mai. Chutihrual chuan hnamdang te hriata HIV/AIDS a hluarzia sawi tam lutuk erawh a hlauhawm thung. Mizoram hi he natna hluarna rama kan tarlan nasat lutuk chuan khualzin miten min tlawh serh ang a, chumai bakah state pawna Mizote pawhin harsatna an tawk thei ani tih erawh kan hriat tel a tha hle.

Tun hnaia Health Minister in MLA te puala he natna chungchang zirhona a buatsaih hi a fakawm hle a. Kan MLA te hi mipui aiawh an ni a, mipui zirtir kawngah pawh awmze nei taka hma la theitu tur an ni. HIV/AIDS dona atan hian sum tam tak sen a ngai a, sawrkar laipui atangin sum hmuh a beitham nen MLA zahawm tak tak te hian tun aia tam zawk hian he natna do kawngah sum leh pai, tha leh zung seng thei se kan dinhmun chhe tak atang hian a tha zawnga hma kan sawn theih ngei a rinawm e.