Aizawl: Health minister Dr. R. Lalthangliana chuan India ram state leh UT zingah Mizoram chu mihring cheng zat atanga chhuta HIV/Aids hluarna ber a ni tih sawiin, a chhuanawm loh takzet tih a sawi a. MSACS project Director Dr. Lalthlengliani pawhin HIV/Aids-in Mizoram zim tê a rûn mek vangin mahni dinhmun inhriatchian a pawimawh tih a sawi.

November 11, 2022, Zirtawpni zana Mizoram State Aids Control Society (MSACS) leh Central YMA tangkawpin HIV/Aids dona kawnga hmalakna thar an kalpui tur, ‘Zoram Harh Rawh’ programme hawnnaah thusawiin health minister chuan Mizoram ang mihring tlemnaah heti taka HIV/Aids a hluar hi luhaithlak tak a nih thu leh mutmawh hnarmawha neih a tul thu a sawi.

MSACS project Director Dr. Lalthlengliani pawhin HIV/Aids laka fihlim turin mahni inveng fimkhur tura tan lak a ngaih thu a sawi a, “Nikum lama National Aids Control Organisation (NACO)-in HIV estimation state hrang hranga a neihah HIV hrik pai Mizorama awm thei zat chu mi 24,000 a ni,” tiin, “Hemi atanga za zela 64 chu an dinhmun hriatchhuah a ni tawh a, mi 8,600 vel la hriat chhuah loh an awm,” a ti bawk.