Aizawl: Manipura Zofate'n nekchepna an tawrh avanga hla lar tak lo piang chhuak "I Gam Hi Lo Ham?" (Kan Ram A Ni Lo Em Ni?) tih phuahtu L S Mangboi Lhungdim chu vawiin (August 31) zing dar 7 vel khan Meitei silaimu tuarin a ram leh hnam tan a nunna hlan ta.

Zoram Chronicle in a tarlan danin, nimin khan Meitei commando leh an hel pawl Arambai Tengngol te chuan Zohnahthlak khua an rawn bei leh thut a, Mangboia pawh village volunteer ni vein a luah silaia kah hliam a ni a. Hliam na tak tuarin Lamka district hospitalah hruai a ni a, an khawih theih loh avangin Aizawla phurh phawta chuta tanga Guwahati lama hruai tum a nih mek laiin tukin khan a hliam tuar loin a thi ta a ni. 

Mangboia hi kum 42 mi niin a nupui leh fate panga a kalsan a ni. A fanu pakhat chuan tunah hian Khawzawl (Mizoram)-ah class 8 a zir mek.

Mangboia rual hian mi dang pakhat Richard Hemkholun Guite, kum 36 mi a thi tel ve bawk. He inkahna-ah hian Meitei lam pawh an thi nual tih hriat a ni a, eng zat chiah nge thi tih erawh chu hriat chian theih a ni rih lo.

Hla phuah thiam a nihna-ah Mangboia thihna hian Manipura Zofate a nghawng na bik hle.

Manipur buaina nena inkaihhnawih hla lar tak "I Gam Hi Lo Ham I Boulna Gam Hi? (Kan Ram a ni lo em ni kan chenna ram hi?) tih hla hi Mangboia hian buaina lo irh chhuah (May 3) hma daih kumin March thlaa a phuah kha a ni a.

A thih hma lawka youtube-a a kawmnaa a sawi danin, zan khat chu tuin emaw hla phuah sak tura a ngen avangin hla phuah tumin a inbuatsaih a, a rilruah hla thu leh thluk reng reng a lut thei lo a. Beidawngin a mu ta a. Tichuan, zing a han tho chu a tih dan pangngaiin a tawngtai ta a, a tawngtai zo chiah chu he hla 'I Gam Hi Lo Ham' tih hi a thu leh a thluk a rilruah a lo lut nghal a, a ziak nghal zung zung a, darkar khat pawh tling mang loah a phuah zo der mai niin a sawi.

"He hla hi kan impumkhatna leh kan ṭanrualna tura Pathianin min pek liau liau niin ka hria a. Hnam impumkhatna hla a nih avangin mi pakhat chauhin an sak a rem lo a, hnam tin aṭanga zaithiamte sak atan ka ti a ni," tiin a sawi.

Lamka leh a chhehvela Zohnahthlak hnam hrang hrang aṭangin zaithiamte'n he hla hi a rualin an sa a, recording an tih a, video an siam hnu rei vak loah Manipur buaina a rawn chhuak zui ta a, a lo tum lawk anga hnam tin aṭanga hruaitute release tir a tum pawh a ti hman ta lo a ni.

Mangboia hian Kuki-Thado hla nalh tak tak a phuah tawh a. A hla phuah zinga Mizoram atanga kan lo hriat lar tak pakhat chu inpumkhatna lam hla tho "Inthen Thei Kan Ni Lo" (H Lalthakima sak) tih kha a ni. Musician niin Lamka-ah recording studio a nei a ni.