July 6, 2022; Federation of Mizoram Samagra Employees (FEMSE) a tel sawrkar hnathawk mi 5,000 chuangte chuan naktuk, July ni 7 atangin pay revision chungchangah sawrkar atanga thu lawmawm an hmuh loh avangin badge dum an bel dawn a, a tul dan angin an kal zel dan tur ngaihtuah an tum.

July ni 5, 2022 a FEMSE OB meeting chuan Samagra Employees te pay revision chungchangah sawrkar atanga thu lawmawm leh hmasawnna engmah a awm loh avangin badge dum bel nise tiin an rel a, July ni 7, 2022 atangin Samagra hnuaia thawk zawng zawng te chu mahni hnathawhna hmun theuh a badge dum bel vek turin an inhriattir a, an kal zel dan tur chu council meeting a rel turin thu an dah bawk.

FEMSE hruaitute chuan Samagra employee te chu Education department hnuaia mi vek an nih thu leh mi 5,000 chuang an nih thu ZALEN an hrilh a, kum 11 bawr vel an pay revised loh a an awm tawh thu te, kum 2019 a nawrh an huaihawt hnuah, sawrkarin study group a din thu te an sawi a, naktuk July ni 7 atanga badge dum an bel tur chu hun biktuk an siam loh thu leh a tul dan ang zelin an kal dan tur ngaihtuah a nih tur thu an sawi.

FEMSE hnuaiah hian association hrang hrang an awm a chungte chu: Mizoram SSA Teachers' Association (MASTA), Mizoram RMSA Employee Welfare Association, SSA Resource Person Association of Mizoram, Mizoram Instructor Association, Mizoram Samagra Management Staff Association, Samagra Academic Support Staff Association, SEAM Marakanda, Mizoram Hindi Shikshak Sangh CAS leh Special Educator Association (Elementary) te an ni.

FEMSE hmalakna:-

• An hlawh leh dinhmun siamthat phutin, kum 2019, November ni 21, 22 leh 25 ah mass casual leave an la. 
• Sawrkar nena an inbiaknaah an lungawi lohna te, an hlawh leh service dinhmunte enchiang turin study group din nise tih remtih a ni a. Ni 20.12.2019 khan Mizoram sorkarin Study Group a din.
• November ni 27, 2020 ah study group ten an report sorkarah an thehlut.
• June 10, 2022 a Vanapa hall a inkhawmpui an neih ah, Samagra employee te hlawh tihpunna tura finance department proposal chu an pawm theih loh thu leh, FEMSE proposal ang ngeia tihpun nise, ni 10 chhung ngeia tihfel ngei ni rawh se, tih resolution an pass.
• July ni 4, 2022 a cabinet meeting agenda ah Samagra hnuaia thawkte hlawh tihpun chungchang a tel a, mahse, sawrkar thuchhuahin council of minister in agenda an pawm a tarlan zingah a tel lo.