Aizawl May 21, 2024 : Mizoram Board of School Education (MBSE)-in vawii Higher Secondary School Leaving Certificate (HSSLC) 2024 result a tichhuak thei chu MZP chuan lawmawm a ti a. MBSE thawktute thawhrimnaah MZP chuan lawmthu a sawi a ni.

MZP chuan, kum 2023-2024 chhunga MBSE hnuaia pawl 12 exam beitu zirlai 11,824 atangin zirlai 9,227 (za zelah 78.04%) in hlawhtlinna an chang chu lawmawm a ti a. Chutih rualin, la hlawhtling ve rih lo te pawh beidawng mai lova rilru thar pua a lehpekah chuan hlawhtlinna chang ngei tura bei turin MZP chuan a ngen bawk.

Zirlaite chu hmalam pan zel tur an nih angin nasa zawka tan la turin MZP chuan zirlai hlawhtlingte leh la hlawhtling rihlo te a sawm a, ram leh hnam hmangaihna rilru pu chunga hmalam pan zel turin zirlai hlawhtlinna chang thar zawng zawngte duhsakna a hlan a ni.

MZP chuan Higher Secondary School Leaving Certificate (HSSLC) 2024 result chhuaka, stream pathum; Arts, Science leh Commerce atanga Mizo zirlai titha top-3 te theuh chu June 4, 2024 (Thawhlehni) hian Vanapa Hall-ah lawmpuina hun a buatsaih dawn a ni.