Kan thupui han sawi tur hi a hming ringawt atang pawh hian a phurawm hlein ka hria, thenkhat tan erawh a ni lo mai thei bawk a. A tira Siamtuin min duan danah hian Eden huana awma hlim taka leilung luah tura tih kan ni a. Mahse, thil a kal fuh tak loh avangin kan buai zo ta vek a ni. Miin hna a thawh tauh tauh nachhan chu, lo intodelh a, hahdam tak leh hlim taka awm ve kha a tum a ni deuh ber a. Chutiang bawkin lehkha rim taka a zir ngat ngat chhan pawh kan ti thei awm e. Mihring mize hrang hrangah hian hlim thei deuh chi te, hlim teh chiam chuang ngai lo te, etc.. kan awm thei awm e. Hetiang kan nih avang hian thenkhat chuan khawvel inang reng kan hmang nuam deuh a, a thenin kan hmang hrehawm deuh bawk. Awle, vawiinah hlimna chanchin, a rah chhuah, hlim lohna, etc, te thiam ang tawk tawkin han sawi tum dawn ila, kan inhnuk hnawk zo mai mai em lo vang chu maw?! Hlimna chu eng nge ni ang le? Nuih vak vak emaw, rik chel chul emaw ringawt hi chu a ni, kan ti kher lo vang. Miin a zirlaiah emaw, hna a exam-naah emaw hlawhtlinna a lo hmu a, chumi result chuan a thinlungah lawmna nasa tak a pe a, chu chu hlimna kan tih chu a ni thei ang. Chhungkua enkawlna kawngah pawh mite angin Ph.D., MCS, IAS, etc.. te ni le lu lo mah sela, faten nun kawng dik an zawh tlat si chuan, chu baka nu leh pa tana hlimna leh lawmna a awm chuang thei awm lo ve. Nula leh tlangvalte zingah pawh hian ni tina kan rilrua riak reng thin leh kan thlakhlelh ngawih ngawih thinten, kal paha, “I dam thin maw….?”min han tih ringawtte pawh thla ruk ruk kan rilruah a cham thin a nih kha. Tunlaiah chuan fiamthu thiam tak takte pawh kan tamin, chungte chuan min tinui nasa thin hle bawk a; amaherawhchu, fiamthu hi Bible hian a duh lem hran lo va, a tawpna zahmawh rawngkai a nih thin avangin. Bible hian nun hlimna lam hi a sawi nasa hle a, a tum ber a ni kan ti thei bawk ang, ani sawi hi chu tun atanga chatuan daih a ni. Hlimna leh lawmna kan neih ve tlangpuite chu a then rei lo te, tlema rei ve deuh te a ni tlangpui. Tichuan, hlimna chu mihringte mamawh em em leh damchhan pakhat, tangkaipui em em thin ti thei ang. Hlim lohna ve thung hi eng nge ni ang le? Miin a rin loh deuhin emaw natna khirh tak mai a tawk a, chumi ni atang chuan hlim kha a har tawh a ni, a chhan chu hmabak tur kha a thlir lawk loh theih lo va. Sawrkar hnathawkteah pawh thawhpui te, a thente phei chu keini aia fel lo zawka kan hriatten min kaisan khalh sup sup mai chuan hnathawh kha a tui awm tawh lo va, kan zuai rawih thin a nih kha. Chutiang bawkin nupa thu-ah pawh kan kawppuite an lerh riau mai chuan rilru a hah duhin a hlim theih hlawl loh thin a nih kha. Nulat tlangval kawngah te pawh kan ngaihzawng ni vea kan hriatten nupui/pasal min han neihsan thut mai chuan thin a thawngin hriat thiam a har thin hle a nih kha. Hetih lai karah hian rilru lam hrisel lohna avangin nguina, chauhna, hmabak thim em ema hriatna a awm thei bawk. Mi duham leh tha lote tan hlim a har, a chhan chu an thil neih thar leh hlawh chhuahten a tilawm chuang lo, a dang an duh belh zel avangin. Hlim lohna chu min tilungngaitu, buaina titamtu, etc.. a lo ni a; mahse, kan nuna eng lai pawha hmun pawimawh tak chang ve reng a ni. Mi hlim thei takte bula awm chu a nuamin a hahdam hle a, mite ngainat leh lawm an hlawh hle bawk a ni. Tunlaiah chuan thian insiam, chhungkhat laina han siam pawh hi tlema harsa deuh tan chuan a harsa fu tawh mai a, mi hlim thei takte tan erawh thil harsa a ni lem lo. Hlimna chuan chhungkua a tipumkhat a, mite chung en a hlawhtir thuai thin. Kohhran leh khawtlanga harsatna awm neuh neuh awm thinte pawh a tikiang vek thei a ni. Nun hlimna chuan mi a tihrisel a, damlote pawh an hlim viau reng chuan an dam chak duh em em bik a ni. Hlimna hi a hlu a, mi rethei ber pawh awhawm berah a siam thei a ni. Nula leh tlangvalte pawh hmeltha bera min siam theitu a ni. Pathian thu kan awihna kawngahte pawh hian a laimu ber pakhat a ni, ti ila, kan tisual em em lo vang. Hlimna chuan thinur a tikiang a, a ngaidam hmiah thin a ni. Pawisaa lei tur ni ta se a man a tam ngawt ang; chuvang chuan mi te ber, fel lo ber, etc.. te tan pawh a thlawna neih theih a ni, khuanu thilthlawnpek a ni. Nu hmeltha tak, pa hmeltha takte pawh hi an hlim lo hmel hi hmuh a nuam tehchiam lo; chutiang bawkin nula, tlangval hmelte pawh hi a tihmuhnawm loh thei hle. Kristian chhungkua tha takte pawh hi an hlim loh lai hian an awhawm chuang bik lo khawp mai; chhungkaw fel berte pawh hi a lo tibawrhbang thei hle. Khawtlang leh kohhran angahte pawh hian min tidarhtu bul chu lungngawi lohna lo awm neuh neuh thin atang hian a ni duh khawp mai. Ni tin hna lamahte pawh inthlah dahna, zelthel duhna rilrute a siam duh hle. Sawi ta zel ila, politics angahte pawh hian kal hran duhna, helna, etc.. te a pawchhuak duh hle. Doctor-te chuan an tia lawm, damlo, natna inang rau rauah pawh hian lungngai bik riaute hi chu an tha chak duh lo khawp mai, an ti; chu mai a la ni lo, an laka helna, sualna chi hrang hrang, etc.. te pawh hi a bul chu lungngawi lohna atanga lo intan a ang hle mai. Engtin nge hlim theih ang? A chhan na tur chu kan hre nual mai thei. Pakhatnaah chuan kan hrilselnate kan vawn that a, zuk leh human, zu leh ruih theihthil reng renga kan inthiarfihlim a, ei leh inte pawh chintawk neih a, mut hma, thawh hma, tih thufingte pawh kan hman a tul hle ang. Chhungkaw thenkhat tan chuan outing/pinic, han neih ve thinte pawh hi a tha hle ang. Chhungkaw member tinte kan inpawh tlan a, kan thu leh hla, kan in-share ve fo thinte pawh hi a tha hle ang, chumi ti thei tur chuan nu leh pa an pawimawh hle. Mi mal angah chuan movies han en ve thin te, infiamna lamte thiam vak lo tan pawh han tih ve thinte pawh kha mi a tiharh ve thei a ni. Zirlai tan chuan kan zirlai taima taka zir a, kan hlawtlin ngei khan, chu bak a awm lo a ni. Fiamthu lam han ngaihthlak emaw pawh hi a hlimawm viau mai; mahse, sawi tawh ang in ringtu tan chuan a fuh ber lohna lai a awm tlat mai. Internet lamah facebook, whatsup etc.. tunlaiah chuan kan uar hle mai, a tha e; mahse, hei pawh hi limit chin deuh nei thei ila a duhawm khawp mai. A tawp berah chuan hlimna tluantling, hlimna tak tak neih kan duh chuan Bible-te chhiar thin ila; tichuan, a ruka min hmu reng thintu a lo lawm ang a, van malsawmna chhiarsen lovin min vur dawn a ni. Awle, thu fahrah tete kan han sawi lang leh ta nual mai, tute emaw zawkin han sawi sela a ngaihnawm zawk ngei ang; mahse, kan han ti laklawh ve ta si ale, a chhum bung lutuk em lo vang chu maw? Hringnun zinkawngah kan hriat theuh angin, a changin kawng chho, a changin chhuk leh zawl pheite a awm a, sap hla lar ve thin tak pakhatin, “…. Their should be sun-shine after rain, so, why worry now…” a lo tih angin, hrehawmna, harsatna, etc.. kan tawh thinte hi heng, hlimna, lawmna, ti hlu tu, lawmawmzia min hrilhtute an lo ni leh zel thei a ni. Chutiang bawkin harsatna kan tawh chuan a dawt lehah chuan hlimnain min hmuak mai thei a ni tih kha hria ila. Hmm…. sawi tur dang pawh a la awm nual thei awm e; mahse, duhtawk dawn tawh mai ila, chhiartu zawng zawngtena in hun hman zel tur te, hlim taka in hman theih nan duhsakna ka hlan a che u.