Mizo ten DJ kan that ber zinga mi DJ Kniquee (Nicky Chhakchhuak) chu North East-a DJ Festival lian berah a inlan a, main event-ah a perform. DJ's Music  Festival hi hmarchhakah chuan DJ te tana festival lian leh ngaihven hlawh ber a ni mek a, a kharna hun hi nimin khan Meghalaya khawpui Shillong-ah neih a ni.  

DJ Kniquee chuan, "DJ event lian berah play turin min rawn thlang hi ka lawm a, ka phur tawh tak zet a ni. Ka bultan dante ka ngaihtuahin ropui ka ti a, Pathian malsawmna vang liau liau a ni," tiin a sawi. DMF-a perform tur hian North East leh State hrang hrang atanga DJ tha (top) te thlan chhuah thin an ni. Festival a nih ang hian State khatah mai ni loin State hrang hrangah hun hman a ni a, main event hi Shillong-ah neih a ni.

DJ Kniquee hian kum 2000 chho atang khan DJ (Disc Jockey) hi a luhchilh tan a, a zin kawng a bumboh ve hle. Mizorama professional DJ hmasa ber pawl a ni a, Zalen Newspaper ten kum 2004-a Valentine's Day Over Night Party hmasa ber Hrangbana Resort-a an buatsaih tum khan a lo perform daih tawh a, heta tang hian bul tanin tun hun hi a thleng chho ta a ni. Amah hi chetsuana avanga kea kal thei lo wheelchair hman ngai a ni - mahse a beidawng duh lo. 

"Pathian min hruaina leh chawimawina avang chauha he hun hi tawng ka ni. Wheelchair-ah takngial pawh thu rei thei lo ka nih lai a, ka chak lohnate leh tlin lohnate en loa Marema (Zalen Newspaper Editor) in DJ tura min thlang kha ka lawm tawp thei lo a ni.," tiin a bultan chhoh dan a sawi. 

DJ KniQuee chuan sawi zawmin, "Kha event atang khan he DJ khawvelah hian phochhuah ka lo ni ta a, mi tam zawkin ti thei lo tura min ngaih hi ka ti theia midang ka inspire thei bawk a ni tih min hriatchhuah tir a ni. Mi ten min duhsaka hmun hrang hrangah min hire-a tun thlengin ka DJ ta zel a nih hi," tiin mi duhsakna a dawn nasat thu a sawi bawk. 

DJ's Music Festival hi Shoutout Entertainment ten an buatsaih niin, anni hi Shillong-a hmunpui nei an ni. Festival an buatsaih bakah hian DJ zirna institution pawh an kalpui a, tunah hian hmarchhak state hrang hrangah an inzar pharh tan chho mek a ni. DJ's Music Festival hi hmarchhaka DJ Festival lian ber leh a awmchhun a ni.