Aizawl September 9, 2022: Chief Minister Zoramthanga chuan vawiin khan Science Teachers' Association Mizoram (STAM) General Conference, Synod Conference Centre-a neih chu khuallian niin a hmanpui a, hmasawnna atana hmalakna ramngaw leh nungcha humhalhna nen a inkalh lo, a ti.

Chief Minister chuan state in zirna kawnga hma a sawn theih nan sawrkarin theihtawp a chhuah dan te, zirtirtu leh mamawh dang hrang hrangte phurhu tura hma lak zel a nih tur thu te a sawi a, zirtirtute pawh theihtawp chhuah zel turin a sawm a. National Institute of Technology (NIT) a nih dan tur ang taka din a nih theih nan theihtawpa a umpui tur thu a sawi bawk. 

Zoramthanga chuan ram hmasawnna atana hmalakna ramngaw leh nungcha humhalhna nen a inkalh lo a, a kal kawp theih dan zawn zel a pawimawh tih a sawi. "Thil tihdan phung tha lo te, kan thil hman environment tana tha lo (eg. plastic, etc) te pawh a thlakna tur a awm thei zel a, ngaihtuahchhuah zel a tul," a ti. 

Khuallian hian ram leh a chhunga chengte rualkhai leh ngelnghet taka hma kan sawn zel theihna tur chuan ngaihtuahna tidanglam a, ramchhunga awm sa leh neih sa te tangkai leh zual zawka hmang thiam tur leh mahni thawhna zawn theuha thahnemngai taka thawh a pawimawh thu sawiin, chumi atan chuan science zirtirtu kalkhawm te hi a sawm. 

Khualzahawm, School Education Director Dr. H. Lalthlangliana pawhin zirtirtu indaih lohna phuhruk tura Sawrkarin hma a laknaah lawmthu a sawi a. Zirtirtu hna chu missionary hna nen khaikhinin, an thawhna hmun chu khawi pawh ni se, hmanrua a tha emaw tha lo emaw, inpekna rilru nen zirtir hna thawk zel thin turin zirtirtute a chah a ni.

Chawhnu hunah Dr. Krista Roluahpuia, Asst. Prof., IIT Gandhinagar chuan "Scientific thinking: Why is Science important?" tih thupui hmangin Science pawimawhna kawng hrang hrang a sawi bawk.

Science Teachers' Association Mizoram (STAM) General Conference vawiina neih chuan heng a hnuai a mite hi kum 2022-2024 chhung atana hruaitu atan an thlang chhuak a, remchangah chanvo an tinsiam rem ang.
1. Zothanliana
2. Dr.R.Lalengmawia
3. Lalhmukima Kawlni
4. Joel Lalbiakkima
5. Jennifer Lalrinpari
6. Lalmuanpuia
7. Dr.Lalrinthara Pachuau