Aizawl: Mizoramah kum 7 chhungin hmei-chhiate chunga hleilenna thubuai 1,206 thehluh tawh a ni a. Hmeichhe zahawmna tihbawrhban thubuai thehluh zat chu 25%-in a tlahniam niin Crime against women data chuan a tarlang bawk.

Kum 7 chhung, kum 2012 atanga kum 2019 March thlenga Mizoram chhunga thubuai dawn tawh zingah hmeichhe chunga hleilenna bik thubuai 1206 lai ziah luh a nih thu CID te hnen atanga dawn a ni a. Heng zingah hian pawngsual thubuai thehluh hi 469 niin, inrukbo thubuai hi 20 awm a, pasal/ laichin hnaite kuttuar thubuai hi 72 a ni a, zahawmna tihbawrhbanna thubuai hi 602 awmin, heng bakah hian thubuai dang 53 ziah luh a ni bawk. Kumthar 2019 March thlenga thubuai dawn tawh hi 14 a ni. Heng thubuai dawn zingah hian pawngsual leh hmei-chhe zahawmna tihbawrhbanna thubuai a sang fal hle a ni.

Kum 7 chhunga kan hmuh theih chu pawngsual thubuai bikah kum 2012 atanga chhiarin kum 2018 leh 2019-ah hian a tlahniam sawt hle a, 103 atanga 24-ah a tlahniam niin data lak chhuah chuan a tarlang a ni.

Hemi hun chhung vekah hian hmeichhe zahawmna tihbawrhban thubuai thehluh zat pawh 85 atangin 64-ah a tlahniam a. Thubuai dang dawnte pawh a tlem tial tial niin a a lang a. Inrukbo thubuai hi 3 atangin 0-ah a tlahniam a, pasalte kuttuar thubuai ziahluh pawh 8 atangin 5-ah a tlahniam a ni. A pum puia thlirin Mizoram chhunga hmeichhiate chunga hleilenna thubuai thehluh hi a tlahniam sawt hle a, NGO hrang hrangte leh sawrkar tanlakna a zara tlahniam a niin thudawnna chuan a sawi.