July 10, 2023; Keitum khuaa hmeichhe naupang kum 8 mi chu Zirtawpni khan a chin hriat loha bo in a ruang hi an In bula lei laihkhuar-a tui tling ah hmuh a ni.

Thulakna Lenkawl chanchinbu in a tarlan danin, vanduaina tawk hmeichhe naupang hi Lalpeksangi (8) d/o Lalrinsangi niin Keitum Field Veng-a khawsa an ni a, amah hi naupan tet atanga hrisel lo leh naupang dang te pawh phak chiah lo niin Zirtawpni chhun dar 12 vel khan a chhungten a awmna chin hre lovin an zawng a, an In atanga meter 100 vela hla, NH. 54 kawng siam hna thawktu ten lei an laihkhuar-a tui tlinna bulah a kawr leh Chapal hmuh a nih avangin tui ah hian a tla nia rin a ni a, khawl hmanga Tui hi pump chhuah a nih hnuah tuithiam te lutin he tui-khuah ah hian a ruang hi hmuh niin tlai dar 3velah a ruang hi lakchhuah a ni.

He tuikhuah hi ft. 12X13 vela zau a nih thu sawiin, helai hmun ah hian Tui tai te put thinin nikum lam khan tui hi tam vak lo tlingin naupang te pawh an cheng thin niin an sawi a. Tunhnaiah helai hmuna NH. 54 kawngpui laihzauh leh siamthat hna thawktu Company te chuan khawl hmanga lai zauin a thuk lamah an khuar belh bawk a, hetianga an laih hnu hi chuan tui tling a tamin naupang pawh an cheng ngai tawh lo a. Amaherawh chu kawngpui kam mai-a awm a nih avanga chetsual palh a hlauhawm avangin an lo sawisel tawh thin a, Company lam erawh chuan Culvert awmna tur hmun niin an sawi thung a, ke-a kal te tan a him loh theih avangin Inrinni khan hnatlang-a hung an tum laiin Zirtawpni khan vanduaina hi a thleng ta a ni.

Lalpeksangi te hi unau 5 niin amah hi a naupang ber a ni.