Aizawl March 29, 2022 : School Education Minister Lalchhandama Ralte chuan vawiin khan Mizoram Samagra Shiksha hmalakna Sanitary Napkin Vending Machine leh Incinerator-te Govt. Mizo High School, McDonald Hill, Aizawl-ah a hawng. Hmeichhia 25 chin awmna sikulah pek theih a nih thu a sawi.

Edcuation Minister Lalchhandama Ralte chuan Sanitary Napkin Vending machine leh Incinerator bun a ni ta chu hmeichhe naupangte tan hmanraw tangkai tak anih avangin chanchin tha a ni, a ti. Minister chuan April 5, 2022-ah school hawng tura inbuatsaihna a kal mek lai a, hmeichhiate puitu tur kan han chhawp thei hi a ropui a, school hawn tur nen pawh a inla lawn tha hle a ni, a ti bawk. 

Minister chuan vending machine hi zirlai hmeichhia 25 chin awmna sikulah pek theih a ni a, tunah hian school 817-ah bun a nih tur thu a sawi a, school dangah bun belh zel tum a ni, tiin school 1300 vel-ah dah tum a ni a ti bawk. Minister chuan Mipa naupangte hi hmeichhia naupang period lai hrethiam tur leh fiam lo tura fuih pawh an tul hle, tih a sawi.

"Zirtirtute pawhin naupang thang danglam zel leh an zia te an hriat thiam a tul. Sanitary Napkin Vending Machine chu khawl man to anih avangin school neitu ten enkawl uluk a, vawng tha rawh u, khawl dahna turah hmeichhe naupangin an pan hreh lohna tur hmun te thlan a tul a ni," Education Minister chuan a ti.