Tun hnaia Mizoram State Commission for Women (MSCW) ten function pawimawh tak an neih tuma telpuitu kan Chief Minister zahawm tak Pu Hawla khan state danga hmeichhe politician ropui tak tak leh hlawtling takte ang hi Mizo hmeichhia awm ve thei se tia a rualawh thu a sawi chungchang kha ka ngaihtuahna lo awm mek a nih avangin tlem i’n tuihnih teh ang. Khawvel ram zau zawk kan thlir chuan tun hma atang tawhin hmeichhe politician ropui tak tak heng - Margaret Thatcher (1925-2013) British Prime Minister hlui hmeichhe rothap tak mai te, Golda Meir (1898-1978) Israel Prime Minister hmasa ber leh Israel dinthar leh lai hun khirh taka hruaitu ni thei te, Indira Gandhi (1917-1984) India rama Hmeichhe Prime Minister hmasa ber leh a awmchhun, a hunlaia India ram tual chhung buaina tam tak karah pawh ram hruai thei hmeichhe fel tak leh kan thenawm mai, Pakistan, Muslim sakhau lalna ram hmeichhe dah pawimawh lo leh ngaihnepna tak rama Prime Minister ni thei Benazir Bhutto (1952-2007) te an lo awm tawh thin a nih kha. Tunlai khawvelah pawh America ram ropui hruaitu lu ber nih tum tawh leh nih tum leh mek Hilary Clinton te, Angela Merkel Chencellor of Germany te, Burma ram zalenna atana tun thlenga thawk reng Aung San Suu kyi te ngaihtuah chuan kan Mizo hmeichhiate hian engvangin nge Politics hi an luhchilh loh bik ang a, an theihna te leh an thiamna te hi ram tan an hman loh bik ang tih hi zawhna lian tak a ni reng a ni. India ram state 29 leh U.T. 2-ah hian Chief Minister atana hmeichhe awm tawh chu 15 lai a ni a, tun dinhmunah hmeichhe 4 laiin Chief Minister dinhmun an chelh mek a. Chungte chu Vasundhara Raje (BJP) Rajasthan, Mamata Banerjee (All India trinamool Congress) West Bengal, Anandiben Patel (BJP) Gujarat leh hmanni lawka eiruk thubuai atanga a fihlim leh tak avanga thunei leh ta Jayalalithaa (AIADMK) Tamil Nadu te an ni. Thawkkhat lai, UPA sorkarah phei kha chuan India ram dinhmun sang leh pawimawh zawng zawng kha hmeichhiain an luah vek emaw tih mai turin UPA Sorkar thuneitu ber, Chairperson Sonia Gandhi khan President atan an party hruaitu hlun hmeichhia Pratibha Patel kha President of India atan a candidate-tir a, India ram President (2007-2012) a ni ta reng a. Chu mai duhtawk lovin rorelna sang Lok Sabha Speaker atan pawh hmeichhia tho, Meira Kumar kha a dah leh bawk a nih kha. India ram, Hindu leh Muslim ho, an society-a hmeichhe dah pawimawh lo zet awmkhawmnaah pawh hmeichhiate hi an duai lo hle a nih hi. Mizoramah chuan Pi Saptawni kha hmeichhe MLA hmasa ber (ruat seat) a ni a, chumi hnu deuhah Pi Thanmawii chu kum 1978-ah PC ticket-in Serchhip bialah thlan tlin a lo ni ve leh ta a. Kum 1987 MNF Ministry-ah phei chuan Pi Lalhlimpuii chu Minister dinhmun hial a lo thleng chho ve ta. Hun rei tak Mizoram Assembly-a roreltute zingah hmeichhia an awm loh hnuin kum 2014 atangin Hrangturzo bial Bye election atanga thlantlin Lalawmpuii Chawngthu (INC) chu kan lo nei ve leh ta bawk a. Aizawl khawpui enkawltu thuneitu sang AMC inthlanah hmeichhe pual bik seat hausakah hmeichhe eng emaw zat an lo tling chho va VC leh LC-ah hmeichhe seat hausak atangin Politics khawvel kan Mizo hmeichhia thahnem takin an rawn rap chho leh mek bawk a tih theih awm e. Politics chu eng nge ni? A tawi thei ber leh a mawl thei ang bera kan sawi dawn chuan politics tih thumal hi Greek tawng atanga lak a ni a. Mihringte hi a huhoa khawsa thin leh khawsakho mamawh kan ni a. Mihring kan nihphungah mi dangte nena kan inlaichinna emaw, kan khawsak phung tur leh kan awm dan tur te, kan khawtlang inrelbawlnaah te kalphung kan neih a ngai thin. Chutiang ti tur chuan thuneitu bik leh ro min relsak bik tur hruaitu emaw, hotu emaw kan neih a tul bawk thin. Chhung thila mahni duhthusam leh theihna te , kan mihringpuite chunga tha leh dik nia kan hriatte kan tih ve theihna tura inpekna a ni a, chutiang tithei tur erawh chuan hotu emaw, hruaitu emaw a min ngaitu an awm a tul thung, Chutianga thuneihna neih tel a ngaih si avang chuan chung zawng zawng fawmkemna hmanrua leh ngaihtuahna huam chhung thil chu politics kan tih chu a ni ber awm e. Mi thiam leh zirbingtute chuan mihring hi kan zing thawh hlawt atanga kan zan mut thleng mai hian kan damchhung zawng hi Politcs vek a ni a, tumah a ralban theih loh an ti hial a ni. Chuvangin, keini Mizote Kristian kan nih hma hauh atang inchhung khaw-sak relna chungchanga thuneitu ber a tana NU BER hmang thin hnam tan hi chuan Politics-a kan hmeichhiate an inrawlh ve hi a mawi piah lamah a tul ve hle a tih theih ang. Heti chung hian Mizote hian Politics-ah chang ni lovin, Kohhranah emaw, rosum chungchangah emaw, Hindu leh Muslim te angin langsar takin kan hmeichhe dinhmun dah hniamna hi phochhuak lo mah ila hma kan sawn mawh hle. Hei hi a chhan ber chu kan Mizo rilru, Mind-set ah hian hmeichhiate hi kan dah hniam ang reng hle a tih loh theih lo vang, tawngkamah pawh hmeichhe ngaihnepna tam tak, ‘Hmeichhe finin tuikhur ral a kai lo’ tih ang chi thahnem tak kan nei a. Mizo zingah chi inthlirna Hindu society angin awm lo mah se kan hmeichhe dinhmun langsar tak ni si lova kan dah hniam ang thoin kan history kan en chuan Lusei Lal Sailo rorelna a ni emaw, khawiah pawh kan pipute hunah khan Lal hnam leh hnamchawm hote dinhmun te, Lal mual kil phak upa minho leh hmeithai dinhmunte en chuan Hindu emaw Muslim lalram zau tak Kingdom an tih ang maite kha lo neiin kum 400/500 vel lai chu rorelna lo nei tawh ila chuan chi inthlirna emaw hmeichhe dinhmun endawngnate pawh kha kan nei duh hial a rinawm rum rum. Chuti lam chu engpawh nise, hun lo kal zelah Kristiannain kan culture leh rilru put hmang min thlaksak a, kan ngaihdante pawh a lo danglam ve hret hret. Chutih rual erawh chuan Mizopa rilruah hmeichhe dinhmun chu a la danglam thui lo hle, chumi lanna chiang tak pakhat chu kan Kohhran ziaah hian a ni. Pathianin ama an puiin mihringte hi mipaah leh hmeichhiaah min siam kan ti chungin kan Kohhran lian ber Prysbyterian-in Upa atan hmeichhia kan la ruat thei lo emaw, hun kan la ti lo, (ti te pawhin han sawi ila) zel danah te hian Politics-ah pawh kan hmeichhiate hian hauhsak (reservation) huang pawn lama hlawtlinna chan mai hi chu an la harsat deuh zel dawn ni pawhin a lang. Amaherawhchu, zirna kawngah emaw, eizawnna kawng hrang hrangah hmeichhiaten mipa min khumna a tam tawh hle a, hmeichhe dinhmun chawisan leh an chanvo humhlah kawngahte harh tharna an chang zel a. MLA inthlan hnuhnung berah phei kha chuan party lian zawngin hmeichhe MLA candidate an nei theih a, Kan Home Minister tanglai te pawh an khing ngam tawh a, kan Minister hlui leh Party President meuh pawh khing thei kan nei a, Party official candidate pawh independent-a bei ngam hmeichhe fel leh fing huaisen kan nei chho ve ta zel hian hma chu kan sawn ngei tih a tilang thei awm e. Politics-ah chuan, “Hmelma hlun a awm theih lo va, thiantha nghet pawh a neih theih loh,” an lo tih thin ang mai khan kawng lehlamah chuan Politics hi a nunrawng em em a, kan khingpuite kumkhaw tluana chawrchhuak leh tawh lo tura rahbeh pawh pawi tih lohna hmun a ni a. Kohhran leh khawtlangah kan thatna lai kan inhmuhsak hram hram letling thawkin Politics-ah chuan kan chhiatna leh tlin lohna zawng zawng a telua awm lovin min pho chhuahsak an tum ve thung a. Chuvangin Mi fel leh fing, mi thilphal tak ang a kan hriatte pawh Politics huang an dai chinah chuan archuktuilo chhuahin kan chhuah deuh zel. Politics hi a chhunga siam tha turin kan mi thiam acedemician te, khawtlang rawngbawltu fel Social worker te, Kohhran rawngbawltu Upa te leh Officer fel, bureaucrats te thlengin an lo zuang lut tawh thin. Chumi te meuh pawh misual hruaitu tlakloh ah an chuah fo theihna hmunah chuan kan mizo hmeichhe fing leh fel tak tak te hian an theihna leh finna hmang turin lo zuang lut se, ti a kan Chief Minister a rualawt pawh hi a dik khawp mai. Chung politics hriselno nuaibo anih theihnan leh hmeichhia finin tuikhur ral a kaizia lantir nan kan Mizo Hmeichia te politics ah an zuanluh ve fo hi a hun tawh reng a ni.