Aizawl July 17, 2023 : Bank zinga Mizoram-a branch ngah ber, Mizoram Rural Bank chuan Chairman atana a vawikhat nan hmeichhia an nei a, Mizo nu Sheryl L. Vanchhong d/o Remmawia Vanchhong, MCS (Rtd.) chuan vawiin khan a hna thar hi a zawm. 

Mizo zinga Rural Bank Chairman dinhmun chelh thei palina Sheryl L. Vanchhong hi kum 2001 khan State Bank of India (Delhi Circle)-ah Probationary Officer-ah bultanin SBI branch hrang hrang - New Delhi, Kota (Rajasthan), Dehradun leh Noida-ah te a thawk tawh a. Kum 2006 khan NE Circleah transfer niin Mizoram chhungah pawh Branch Manager, SBI New Secretariat Branch bakah Mission Veng Branch & Aizawl Main Branch ah te a thawk tawh a ni. 

State Bank Institute of Learning & Development (SBILD) Guwahati-ah Faculty hna chelh zawmin, MRB Chairman hna a zawm hma chiah hian Head of Stressed Assets Recovery Branch (SARB) Guwahati, SBI hna a thawk a ni. Sheryl L. Vanchhong hian MRB Chairman hna hi deputation-in kum 3 chhung a chelh ang.

Mizoram Rural Bank hi September 1983 khan Regional Rural Banks Act 1976 hnuaiah din a ni a. MRB shareholder-te chu GOI 50%, Govt of Mizoram 15% leh SBI 35% a ni. Tun dinhmunah Mizoram Rural Bank hian Branch 102 leh hnathawk 475 a nei mek a ni.