ZALEN Aug. 25, 2024; Champhai Vengthara khawsa, hmeichhia kum 54 mi chu vawiin (25.8.24) chawhma khan misual kuttuarin a thi.

ZALEN thudawn danin, Champhai Vengthara khawsa Thahleiiangi (54) chu vawiin chawhma dar 10:30 bawr chho vel khan an chenna in bula an dawr chhungah thi a hmuh a ni a, a taksa-ah chem a zai/sahna hnuhma hmuh a ni.

He thil thleng chungchangah hian Champhai police ten thubuai an ziaklut nghal a, a theih ang angin thil awmdan an chhui zui nghal bawk.

Thudawn danin, he thu ziahlai thleng hian pawikhawihtu man an la awm lo a, rinhleh mai tur ang pawh hriat theih a la ni lo.

Misual kuttuara boral nia hriat Thahleiiangi hi a fate nena khawsa an ni a, zaninah tlaivarpui niin, naktuk chhun dar 12-ah vui a ni ang.