Aizawl: 'Kan ramah sumdawnna kawl a eng mek a, mahse, dan dik lovin hnamdang te kan kawp a, kan intlak khalh tir zel a, hei vang hian kan thalaite hma hun a chhe vek thei a ni," tiin R. Lalngheta, Vice President, CYMA chuan Zirtawp zana Mission Veng Branch YMA, Kum-puan hawn naah a sawi.
'Vai Mizo hminga sumdawng hi an tam hle mai a, tunah phei chuan rod leh cement dawr ah a lei dan kan tar phah tawh a. An buk a tling loh avangin hnamdang hian min ei nasa tawh a, hnamdang sumdawng Mizote'n an thurualpui zel avang hian kan hnam hi min chimral mek a ni,' tiin CYMA Vice President chuan a sawi. "Sawrkar hna a awm tawh mang loh avangin tuna zirlai ni mek te hi sumdawnna la luhchilh tur te an ni a, mahse hnamdang te'n min tlak khalh zel chuan kan thalaite hma hun kan tichhe nasa tihna a ni," tiin a sawi bawk.
CMYA Vice President chuan, "Kumpuan bawhzuia luhchilh thuk zawh poh leh a mangan thlakin ka hria a, a kilkhawr han hrut hi chuan kaihchhuah belh tur a tam tingin ka hre fo thin. Zahna chang kan hre tawh lo mai a ni tawh lova, thil sual tite hian inthiamlohna an nei tawh lo tih hriat hian tan lak a ngaih zia a lang thin a ni," ti a sawiin, "Tanker association te oil an pawlh dal chungchangah kan kawm a, an pute'n hlawh an pek that loh­ vanga ti an nih thin thuin CYMA min chhang a, an ngama an thawk a ni a, hetianga thil dik lo, zak miah lo a an sawi ngam mai te hi a zah-thlak ka ti khawp mai a. Inthiamlohna an nei miah lova, zak tur te hi an zak tawh thlawt lo hi a pawi hle a. Nasa takin ram leh hnam chhan tur hian tha kan chhuah a la ngai a ni," a ti bawk.
Hnamdang te taimak thu sawiin, Mizorama an hnathawhte chu chhuhlet ngai a tih thu CYMA Vice President chuan a sawi a. Hnathawh hreh neih loh a pawi-mawh rualin thiamna hmanga hnam humhalh chu a pawimawh a tih thu a sawi.