Aizawl: Aizawl Municipal Corporation chuan tuna Aizawl khawpuiin bawlhhlawh paihna atana a hman mek, Tuirial bakah Hualngohmun leh Luangmualah bawlhhlawh paihna tur hmun a ruahman mek.

Tun hnaia chanchinbumi thenkhatten an kawmnaah Aizawl Mayor Lalrinenga Sailo chuan Tuirial chuan Aizawl bawlhhlawh a dawl zo tawh lo niin a sawi a. “Tunah hian Hualngohmunah bawlhhlawh sawngbawlna tur hmun kan buaipui mek a, helai hmun siamna atan hian vaibelchhe 26.5 kan hmu tawh a, a thawktu thlan leh buapui ngaite kan buaipui mek a ni,” a ti.

Hei bakah hian plastic bik sawngbawlna tur, Luangmualah an din dawn tih sawi bawkin mayor chuan, “Luangmualah hian plastic bik sawngbawlna din kan tum a. Ruahmanna kan siam dan chuan mipuiah plastic khawn ni bik kan nei ang a, chung kan khawnte chu helai hmunah hian paihin kan hersawm ang a. Recycle ti duhho leh a lei duhte hnenah hralh leh kan tum a. Tunah hian Mizoram PWD-te nen kan indawr mek a, PWD hian kawng siamna atan hman an tum a ni,” a ti a. AMC chuan a theih chin chinah bawlhhlawhte chu sum lakluhna atan hman a tum tih sawiin Tuiriala Solid Waste Manegement Centre-ah pawh bawlhhlawhte chu an hralh chhuak nia sawiin, “A theih chen chenah mahni intodelh kan tum a ni,” a ti bawk.

AMC hmalakna dang sawiin mayor chuan, “Property tax kan khawn mek hi kum 2014 kum hmanga khawn a ni a, hemi hnu hian in sa thar leh sak belh mi thahnem tak an awm a. Hengho hian property tax an pek loh avangin kan hmuh belh tur hi tam tak niin kan ring a; chuvangin, tunlai hian survey kan nei thar leh mek a ni,” a ti a. AMC-in building permit a pek kum thum hnua thi mai thin chu engineer-ten an en a, a la that a hman theih a la nih chuan renew leh theih tura tih an tum niin a sawi bawk.