ZALEN: Hmunphiah lei tur lakhawmtute Vairengte Hmunphiah Collector Association te chuan vawiin ni 28 January khan thuchhuah siamin Hmunphiah chingtute hmunphiahte lak tir turin an ngen a, huan neitute hma khua ngaiin Hmunphiah (hring) Kg ah cheng 35/- aia tlem loin bul tan an tum a, rate hi a ni tela sang chho zel turin an beisei tih an tarlang. 

Sawrkarin Free Royalty kalpui a tum avangin hmunphiah te chu phurh chhuah theih lawk loh vang nia thudawn a ni bawk a. Hei vang hian collector te pawhin hmunphiah an la hma thei lo niin an tarlang. An harsatnate chu sutkian a nih avangin ZPM Serlui North Block hruaitute chungah Vairengte Hmunphiah Collector Association te chuan lawmthu an sawi tih an tarlang bawk.

Tarlan thin tawh angin Sawrkar chuan hmunphiah ro (a hring ni lo) lei tur hian RR Associate, Kamrup, Assam chu thu a ziahpui tawh a, a ro rate hi a hniam berah kg-ah Rs 100 bituk a ni.

Hetih lai hian ZALEN in thu a dawn danin hmunphiah hring hi kum dangah chuan a that vanglai chuan kg ah Rs 40/45 te'n an hralh a, Rs 40 rate tlanglawn a ni tlangpui a. "A ro kg 1 chhuak turin a hring kg 3 tih ro a ngai a. A roa hralh tur chuan a tih ro hun ni 6/7 vel ngai nen, hmun zau a ngai bawk nen a buaipuina hautak nen, a hringa hralh vat hi a hlawk zawk a, a lak hunchhung a rei loh avangin tihfel thuai thuai ngai a ni," tiin thudawnna chuan a sawi bawk.