Aizawl February 17, 2024 : Tunlai hi hmunphiah keh hunlai niin kum dangah chuan kuthnathawktuten an hralh that lai ber a ni a. Mahse a rate a tlahniam nasa a, nikum tun ang hun vela hmunphiah ro kg ah Rs. 50-a an hralh thin kha kumah chuan Rs. 25 ten an hralh nia thudawn a ni.

ZALEN thudawn danin Mizoramah chuan Kolasib leh Mamit district hi ram leilung leh sik leh sa avangin hmunphiahin a ngeih a, district pahniha hmunphiah tharchhuahte pawh a quality a that bakah a leitu hnam dang sumdawng tan pawh lei a awlsam avangin kum dangah chuan an hralh tha thin hle an ti.

Vairengte chhehvel chu hnam dang sumdawngten an leina hmun ber ni thinin kawngpui dung hmun remchangah an lei mai thin a. Kuminah erawh a leitu an awm mumal loh avangin a rate hi a tlahniam nia thudawn a ni a. Hmunphiah rate hi kumthar lamah chuan a san chhoh leh beisei a ni.