Aizawl; Hnahlan Grape Growers’ Society chuan tunlai hian kuthnathawktute grape rah an lei mek a, Champhai winery chuan July 13, 2022 atangin grape rah hi lei tan an tum thung.

ZALEN-in a biaknaah Hnahlan Grape Growers’ Society hruaitute chuan tun dinhmunah grape rah quintal 160 an lei tawh a, heng grape-te hi an her mek a, la lei chhunzawm zel an tum tih an sawi.

Zawhna chhangin Hnahlan Grape Growers’ Society hruaitute chuan, “Grape leina atan hian Rs. nuai 60 kan dah a, kan khuaa grape thar zawng zawng hi lei vek theih kan tum a ni,” an ti a. Kumin hian grape rah thar quintal 800 atanga 1,000 inkar vel an beisei tih sawiin grape rah hi kg-ah Rs. 60 zelin an lei a, pawisa pawh an pe nghal zel tih an sawi bawk.

Grape rah hi kum hmasa lamah chuan kg khat Rs. 50-in an lei a, kumin atangin Rs. 60-in an lei tan a ni.

Champhai Grape Growers’ Society erawh chuan grape thar hi an la lei lo a, harsatna adang a awm loh chuan July 13, 2022 atangin lei tan an tum.

ZALEN-in a biaknaah Champhai Grape Growers’ Society hruaitute chuan, “Kuminah hian quintal 1,400 vel lei tumin kan inbuatsaih mek a, tunah hian a tui dah khawl sa la nei nual mah ila zawi zawia tihral theih kan beisei a ni,” an ti.

Grape rah chu a bain an la dawn nia sawiin, “Kumin atang hian kg-ah Rs. 60 in lak kan tum a; mahse, grape rah leina hi kan payment thei dawn lo a. Kan grape tuite kan hralh chho zel ang a, November-ah chuan loneitute account-ah thun vek kan tum a ni,” an ti bawk.

Hnahlan leh Champhai Grape Growers’ Society hruaitute chuan naktuk Thawhtanni hian Chief Minister Zoramthanga hovin cabinet meeting an thu dawn nia an hriat thu sawiin an chungchang pawh an ngaihtuah ngei an ring tih an sawi a, sawrkar lakah beiseina sang tak an nei tih ZALEN an hrilh bawk.

Grape Chingtu ten eng nge an sawi?

Grape leina atan hian Rs. nuai 60 kan dah a, kan khuaa grape thar zawng zawng hi lei vek theih kan tum a ni.
- Hnahlan Grape Growers’ Society

Kuminah hian quintal 1400 vel lei tumin kan inbuatsaih mek a, tunah hian a tui dahkhawl sa la nei nual mah ila zawi zawia tihral theih kan beisei a ni.
- Champhai Grape Growers’ Society