Aizawl: Mizorama grape chingtu hmasa leh larpui hmasatu Hnahlan Grape Growers Society chuan tunhma lama an siam ang ni lo ‘Wine’ tha zawk siam turin hma an la mek.

Zalen palaiin Hnahlan Grape Growers Society hruaitute hnen atanga thu a dawn danin an winery atanga an siamchhuah thin ‘Zawlaidi’ ang ni lo, khawvel huap pawha zahpuiawm lo tur natural wine siam tumin hma an la mek tih an sawi a. Hemi atan hian mi thiam ruaiin kumin atang hian siam chhuah hman an tum tih an sawi bawk.

Hnahlan Grape Growers Society hruaitute chuan Mizoram sawrkarin an hnathawhte a tuipui avang leh winery tihchangtlunna atana hma a lakpui avangin an lawm hle tih an sawi a. Tunlai hian grape tharchhuahte an lei mek tih sawiin a thar ang ang chu lei zawh vek an tum thu an sawi bawk a. Grape hi kg ah rs. 40 in an lei a, grape leina man hi pek nghak zel a ni. Hnahlan winery-ah hian grape tui neihsa a awm tawh lo a, leiba pawh an nei lo niin Society hruaitute chuan an sawi bawk.

Champhai Grape Grower Society pawhin Ningani atang khan Champhai leh a chheh-vela Grape chingtute thar chhuah Grape an leisak a, kg 1 Rs. 50 zelin an leisak a ni.

Champhai Grape Growers Society hian Tlangsam khuaah winery neiin an tharchhuah Grape Wine te hi a hlawmin kum 2018 thleng khan M/s Radiant Manufacturers Pvt. Ltd chuan a la thin a, MoU an sign hi a tawp tak avangin Wine hi an hralh tawh rih lo va. Baptist Church Mizoram chuan Sacramental Wine tur an siamtir a, Mizoram chhungah Champwine leh Zowine an zuar chhuak bawk a ni.