Aizawl May 22, 2023 : Public Health Engineering Department (PHED) Hnahthial WATSAN Division hnuaia Rallangtlang, Hnahthial-a tui dahkhawlna tuizem lian (reservoir) an siam mek chu nimin tlaia a chung slab an chhun laiin, a hnuai lama a dona in dawl lovin a chim a, vanneih thlak takin thi an awm lo.

He tuizem lian hi liter nuai li leh sing nga (4.5 lakhs lts) dawng tura sak niin fit sawmli pakhat (41ft) hawlhtlang, fit sawm paruk leh a chanve (16.5fit) a sang a ni a, a chhung hi Bazar Unit Thalai Kristian Pawl (TKP) chuan inhlawhna atan an chhung a, nilengin an chhung a, an chhung zo tep tih tlai dar 5:30 vel khan a hnuai lama a dona chuan zo lovin a chim ta a ni.

A chim lai hian tuizem chhunga awm chhuah tum mek Malsawmtluanga, kum 22, Peniel chu a delh a, a ke pahnih delh bet mahse vanneihthlak takin hliam na lutuk nei lovin x-ray-ah pawh ruh tliak a awm lova, damdawi inah pawh admit a ngai lo a ni. Mi 2 Lalvenpui, Peniel leh Kapengzauva, Bazar te pawh a chung atang hian an tla bawk a, vanneih thlak takin hliam na lutuk an tuar lova, Kapengzauva hian a keah hliam a nei a, ani pawh first aid pek a nih hnuah chhuahtir leh nghal a ni.

Thu dawn danin he tuizem lian siamna sum hi UD&PA scheme AMRUT 2.0 sum PHED lamah an pek chhawn a ni a, cheng nuai sawmli pahnih (42) senga siam niin contractor Tanpuia, (TPA), Aizawl Melthum lam niin, ani hian PHE Department a enkawl chhawn tir a, department hian mistiri pakhat hnenah theka in an pe chhawng ve leh niin thu dawn a ni.