Aizawl : Nimin June ni 1, 2019 (Inrinni) khan Dr. R. Lalthangliana, Health Minister chuan Hnahthial District tihchangtlun tuma hmalakna kal zelah, he district-in a ken tel chhunzawm zel tur sorkar office hrang hrangte tih lenna tur chu, a hmunah a tlawh hlawm.

Sawrkar office hmun tur hrang hrang tlawh kulnaah hian department hotute leh staff-ten an lo tawiawm a. District tihpuitlin nan DC leh SP Office-te chu hna hmasa bera neih a tul thu a sawi.

Minister hian KVK Hnahthial chu tlawh hmasa berin anni hian tunah rih chuan mamawh tul zual em em an neih rih loh thu an lo hrilh. Sub-Divisional Agriculture Office chu SDAO leh thawktuten an lo enpui angin, District Agriculture Office sakna hmun hma turte a enpui a. PHE EE office staff-te nen SE office sakna tur hmunte an enho.

BDO office hmunah Pro-ject Director Office sakna turte an en a. Police ramah SP Office sakna tur te, SDO (Civil ) office te, Sub-Divisional Education Office te, Divisional Officer (Soil) office te, Hnahthial SDO (P&E ) office te, Sub-Divisional Horticulture office leh EE (P&E) tihlenna tur leh Quarter hmun hma leh sakna turte a enfiah a ni. Thangtea chuan a tul angin Department hotute chu proposal siam zung zung turin a hrilh nghal bawk.

Health minister hian Falkawna Zoram Medical College tlawh nghalin Department hotute nen hmalak dan kal zel turte an sawiho nghal bawk a ni. Principal Director, Dr. F. Lianhlira, H & FW leh mi pawimawh dangten Minister hi an tawiawm a ni.