Aizawl July 14, 2023 : Vawiin khan Hnahthial RD Block- in kum 60 an tlin champha, Diamond Jubilee chu Hnahthial RD office complex ah lawmna hun an hmang a. Rural Development Minister Lalruatkima chuan Khuallian niin a hmanpui. Kumin June thla a sak zawh DRDO Office chu a hawng nghal bawk a ni.

Lalruatkima chuan DRDA Office ni thin chu Central sawrkar-in state sawrkar mawhphurna ah a dah tak avangin DRDO ah leh a nih a ti. Covid hripui leh harsatna karah state sawrkarin intum chawpa DRDO office kalpui tura ruahmanna siam a ngai ta a ni tih sawiin district hrang hrangah DRDA office hnathawktu awmsa te chu a theih ang anga absorb an ni a ti. District thar 3 zingah Khawzawl leh Saitual ah te DRDO hawn a nih hnuah Hnahthial DRDO hawn theih a lo ni ve leh ta chu lawmawm a tiin thawktute inpekna ah lawmthu a sawi a ni.

Minister chuan RD department chu mipuite rinchhan leh innghahna department a nih angin khawtlang mipui leh pawl te, kohhran te pawhin an pan rawn a ni tiin department hnathawktute chu rawngbawlna thinlung pu turin a fuih a. Mizoram chu India rama state titha ber pakhat a ni tih a sawi a. Ni 100 inhlawhna ni 100 kalpui state dang an awm lo tih a tarlang bawk.

Hnahthial DRDO office building hi sum 169.68 lakhs hmanga sak niin September 11, 2021 khan hna tan a ni a. June 24, 2023 ah sak zawh a ni a. Tunah hian Project Director tiamin thawktu officer leh staff 17 an awm a ni.

Hnahthial RD Block Diamond Jubilee lawmna ah hian R.Lalthazuala Director, RD Deptt leh Lalvenhima Addl D.C & Project Director ni bawk te pawhin thu an sawi a. Lalremruata Sailo BDO Hnahthial in Jubilee lawmna report a pe a. Irene Zohlimpuii Chawngthu Addl. Secretary RD Department in lawmthu sawiin hun hnung a khar a ni.