Aizawl August 14,2024 : Mizo Students' Union General Headquarters Aizawlin RIPANS hnalak chungchanga an hmalakna kal mekah vawiin khan Aizawl DC Conference Hall-ah Aizawl DC Lalhriatpuia, MCS kaihhruainain MSU hruaitu leh RIPANS hotute chuan inbiakna an nei.

RIPANS in June 25,2024-a Employment Notice an chhuaha Post 14 awmah Scheduled Tribe quota seat 1 chauh dah a ni chu MSU chuan dahbelh turin a ngen a, RIPANS hotute hian Central lam hotute dawrin DOPT-ah file hi lut tawhin MSU te chu lo nghak hram turin a ngen a, DOPT insiamrem lai anih avangin MSU chuan zahawm an ti a, hemi chhunga hnalak dang awm reng rengah Local Preference duhsak bik ni se an ti. RIPANS-in employment notice a chhuaha post 14 a post 4 Unreserved post dahah pawh Local mi ngei lak nise an ti bawk.

MSU chuan RIPANS Hospital din tura hnalak chungchanga Circular chhuaka NORCET hmanga hnalak tura chhuah a ni chu a duh lo hle a, NORCET hmanga hnalak anih chuan Hnamdang mi tamtak an lo lut dawn a, damlote tana harsatna tamtak thlentu anih dawn avang leh ram leilung fate an ram ngeia an chanvo leh an hmasawnna tur rahbehna anih avangin NORCET hmanga hnalak anih chuan a tawp thlenga an dodal tur thu an sawi a, RIPANS Director chuan NORCET chungchanga Central an dawrna ah Mizo mipuite tana thaber tura thuthlukna an siam ngei a beisei thu a sawi.

RIPANS admission chungchanga kumtina neih thin RIPANS Common Entrance Test tihtawp a ni chu MSU chuan hmang chhunzawm turin a ngen a, SMATEE leh NEET chauh hmang lo a RCET hi hmang leh ngei turin an nawr a, Director chuan an meeting naah pawh a lo thlen tur thu leh a tlang ngei a rinthu a sawi bawk.