ZALEN January 18, 2024 : Mizo Students’ Union: General Headquarters, Aizawl chuan kumin 2024 atana Office hawnna programme chu vawiin ni 18 January, 2024 khan MSU Pisa Puiah an nei a, He huna thu sawitu MSU President Samuel Zoramthanpuia chuan hnam dang lakah hmlak an tum dan hrang hrang a sawi.

MSU President Samuel Zoramthanpuia chuan, "Mizoram sawrkar Pisa chhunga hnam dang inrawlhna enfiah a ni ang, Mizo hnam tiderthawngtute um chhuah hna leh sawrkar tichak turin Mizo zirlaiten hma kan la dawn a ni. Ram leilung fate’n kan tih ve theih Sawrkar Pisa hrang hranga Contract, Supply leh hna chi hrang hrangah hnam dang inrawlhna avangin eirukna leh sum chheprelna a tam thin tih kan hria a, hei hi kan State sum leh pai ram pawna a luan chhuahna bul ber a ni bawk. Heng ti tawp tur hian Mizo hnam hmangaihna nena Office hrang hranga thawkte thawhpuina kan ngen a ni," a ti.

Zorama chuan, "MSU hi zirlaiten khawvel zau zawk an hawi theih nan Ministry of Corporate-ah in-register a ni tawh a, Mizoram chhunga hnathawk Company te chu CSR kaltlanga zirlaite hmasawnna tur atan tha thawh turin a hriattir a, an tihtir ti thei lo company chu zawhna an dawn atanga darkar 24 chhunga an insawi fiah thei lo a nih chuan MSU chuan Mizorama hna an thawh chhunzawm a remtih bik dawn lo," a ti.

Zirlai te loan lak theih loh chungchang sawiin, "Student Loan pe thei lo Financial Institution te pawh Zirlaite atanga complain a awm ni la la-a an insawifiah thei lo a nih chuan kawng kharsak an ni ang. MSU chuan Zirlaite hmasawnna atana hma lakna kawngah khawtlang nu leh pa te thawhpuina leh thlawpna a ngen nghal bawk. Ram leh Zirlaite tan MSU chu a tawp thlengin a kal zel dawn," a ti bawk.