Aizawl: Mizo Zirlai Pawl (MZP) chuan Mizorama political party hrang hrangte chu 2023 MLA inthlanpui lo awm turah candidate atan hnam dang emaw, hnam dang nupui pasala neite dah lo ngam turin a ngen a, ngenna chu party tinte ziakin an pe.

MZP chuan hnam dang lakah kan ram leh kan hman a himna turte leh kan hnam kal zel tur chungchang a ngaihtuah tih tar langin, chumi kawngah chuan phak ang tawkin hma an la reng tih an tar lang.

Kum 2023 tawp lama Mizoram Legislative Assembly Election chungchang pawh MZP chuan a ngaihtuah thleng tih party tinte hnena ngenna an pekah tar langin, hemi chungchangah hian political party tinte hnenah hnam dang candidate-a dah lo tur leh hnam dang nupui/pasala neite party candidate atan chhawpchhuak lo turin ngen nise an tih thu te, chung an ngaihtuahnate chu ngaih pawimawhsak a, 2023 MLA election lo awm turah party candidate atan hnam dang emaw, hnam dang nupui pasala neite emaw dah lo hram turin an ngen tih an tar lang a ni.

Hemi chungchangah hian MZP President Lalnunmawia Pautu chuan ZALEN zawhna chhangin, party-te hnena ngenna an siam chu Mizo hnam leh ram himna atana a pawimawh hle tih sawiin, minister-ah hnam dang an awm apiangin a bikin technical lamah buaina a awm thin tih a sawi.

MZP president sawi danin ngenna an siam chu party lamten an chhan kher a phut lo a, hetihlai hian People Conference (PC) Party chuan MZP ngenna anga kal an tum thu ziakin chhanna an pe a. Party dangte pawhin an ngenna zawm ngei se tih chu MZP duh dan a ni.