May 9, 2022; Tukin zing khan Chief minister Zoramthanga'n 'Hnam inpumkhatna bus service hmasa ber' Aizawl - Behliangchhip (Inter - state service) chu a vai liam. CM chuan Zofate Jerusalem Mizoram chuan chhak leh thlang, chhim leh hmar a kan unau awm zawng zawngte a huapzo tih a sawi.

Transport minister TJ. Lalnuntluanga kaihhruai, tukin zing dar 6:30 a bus vai liamna programme, Transport department office a hmanah thusawiin, CM Zoramthanga chuan, Hnam inpumkhatna bus service vai liamna hun hman a ni thei ta chu lawmawm a tih thu leh kan ram history ah a vawi khat thlenna a nih thu sawiin, Mizo hnam tan hun pawimawh tak a nih thu a sawi.

Zampui tlangdung a MST bus service tir turin sawrkarin theihtawp chhuah a hma a lak thu sawiin CM chuan, Covid in nasa taka a tihbuai vangin an duh ang erawha an kal theih loh thu a sawi. "Covid hrileng karah theihtawp chhuahin kan ti fat fat a, transport department leh a changtu minister in hma a lakna zarah a hlawhtlinna a lo awm ta hi lawmawm ka ti tak tak a ni," CM Zorama chuan a ti.

Hun kaihruaitu Transport minister TJ. Lalnuntluanga chuan chhungkua pawh an inpumkhata, an tanrual chuan an ropui ang bawkin, a hnam ang zawnga Zofate kan inpumkhatna chu kan Zo hnam zahawmna leh ropuina a nih thu a sawi. 

Hun khirh lai ber hripui len laiin bus service na tur atan chief minister zahawm tak in bus leina tur atan sum mamawhte leh tul ang ang hma a laksak zel tih sawi bawkin, Zampui tlang dunga kan zohnahthlakte nen kan inkalpawhna tur Hnam inpumkhatna bus a zara vai liam a ni thei ta chu lawmawm a tih thu a sawi bawk.

Bus service dan tur:
Aizawl - Behliangchhip
Monday - 6:00 am
Thursday - 6:00 am

Behliangchhip - Aizawl
Tuesday - 6:00 am
Friday - 6:00 am

Aizawl - Behliangchhip bus chuan man - Rs. 476