Aizawl: Higher & Technical Education Minister Dr. R.Lalthangliana chuan, "Hnam rilru kan put a, a taka kan hnam ziarang tihlan zel i tum ang u," a ti.

Zirtawpni kalta zan khan Mizo Students' Union (MSU) Federal Meeting 2022, Thingsai Community Hall-a neih a hmanpuina ah he thu hi sawiin Higher & Technical Education Minister ni bawk Dr.R.Lalthangliana chuan, "Nationalism a taka nunpui duh tlattu ka ni ve a, Shillong-ah 1980 khan MSU dinin Founder President ka ni ve a. India sawrkar leh MNF inep lai khan Tezpur Jail-ah Mizo nula dam chhung tang tura tih, rei tak lo tang tawh chu kan hmalakna Pathianin mal min sawm a, kan in la chhuak a ni.”

“Mizote hi la tlem hle mah i la, hnam dang tluk  lohin kan insiam thei a. Tih tak zeta zirlaite hian hma kan lak chuan India ramah nasa takin kan inpho chhuak thei ang. Vai tih theih chu kan ti ve thei, All India Service lamah te nasa takin tan la thar ang u," a ti. 

Dr.R.Lalthangliana chuan MSU Federal Meeting chu Thingsai-ah lo nghah awm reng nia a hriat thu sawiin, tlawm ve ngai lo Lalnu Ropuiliani, zaithiam leh hlaphuah thiam Lalsangzuali Sailo, P.Rohmingthanga IAS, M.Tumsanga Police lama kan mi lar te leh mi hmingthang tam tak lo chhuahna a ni tih a sawi bawk.