Israel-te’ tih tawh chuan Mizote thinlungah hian an tla na viau zel. Arab ramte nena an inngur chang pawhin a dik a dawk thlu lovin kan lo pawng paw tan viau zel mai. Zofate zingah pawh Israel hnam bo nia inchhal, Israel rama pem lut tate pawh an awm tak nual hi.

Pu C Rokhuma (L) khan Israel-te chanchin hi a tuipuiin, a ziak nasa khawp mai bawk. Arab ramte nena an indo dan te, Israel sipai chet vel dan te ngaihnawm takin a ziak thin. Tum khat pawh ti hian an zawt a, “Ka pu, Israel te hi Arab ram tangrual hian do rawn se, a tu nge chak zawk ang?” an ti a, Pu C Rokuma chuan, “Israel-te ne pawh an ek lo ang,” a ti a. “America nen indo ta se” an ti leh a, “Israel-te an chak ang,” a ti leh a, “A nih leh khawvel hian do rawn ta ila?” an ti leh a, “A hmuhnawm khawp ang,” tiin a chhang e an ti. Pathian hnam thlan an nih vang ni maw, heti taka Mizote thinlunga Israel-te an tlak nat mai hi.

Israel hnam ropuina thuruk chu an hnama an chiang em em mai hi a ni. Khawiah pawh awm se, an hnam zia (culture) leh sakhua an hransan ngai lo. Hun thim leh hun harsa tawpkhawk an paltlang lai pawhin an sakhua leh an hman nun an humhim tlat a, ropui takin an ding chhuak leh ta a ni. Israel-te tawn ang hun harsa hi tawng ve dawn ila, eng hnam mah hian kan paltlang zo kher lo ang.

Isua an khenbeh atanga rei lo tê, Rom sawrkar awpna hnuaia an awm lai khan AD 66-ah Juda-te chu Eliazara hovin an hel a, Rom sawrkar chuan dim baksak lovin a nuai ta a, tam tak an thi a, an Temple an halsak a, an khawpui Jerusalem pawh nasa takin an tichhia a, kulh bangte chu a chim rem rum mai a ni. An thah bângte chu khawvel ram hrang hrangah an darh zo ta a, an tiavai zo ta a ni. An vahvaihna ramah te chuan tihduhdah, hmuhsit leh engdawng an tawk zel a, Indopui II-na hunah khan Hitler-a ngawt pawhin Juda mi maktaduai tel a suat a nih kha. Juda huat khan a haw tawp mai a, thah mang vek a tum ringawt mai a ni.

Kum sanghnih deuh thaw khawvel ram hrang hranga an tiavai hnuah kum 1948-ah UNO chuan Israel ram chu independent ramah a puang leh ta a, Israel-te chu ram pek an ni leh ta. Khawvel ram hrang hrang atangin Israel mi tam tak an ramah an hawng leh ta chum chum mai a ni. Keini Mizote hi khawvel ram hrang hrangah, hnam hrang hrang karah kum sanghnih dawn awm darh ve ta ila, a hnam ang chuan kan ral thum mai lo’ng maw?

Israelte ropuina em em chu, an vahvaihna apiangah an hnam zia, sakhua leh tawng an humhim zel a, khunkhan takin an fate an zirtir zel a, hnamah an chiang em em mai hi a ni. An sawi thin a, Israel naupang kum 10 tling chin chuan an hnam history, Abrahama atanga hnama an indin chhoh dan te, Aigupta sala an tan lai chanchin te, Mosia hmanga Pathianin a hruai chhuah dan te, Joshua hoa ram tiam Kannan an luh dan te, Roreltute hun laia an hnam inawp dan te, Lal an neih dan te, Babulon sala an tan lai chanchin te, Persia lal Kura thupeka an sal tanna atanga an let leh tak dan te, Nehemia hoa Jerusalem kulh an din thar leh dan te, Greek ho hnuai an awm lai te, chumi hnua Rom sawrkarin awp tak dan te hi a tlangpui an hre vek a ni an ti.

Keini Mizote pawh Pathianin hnamah min din a, kan chenna tur ram min pe a, ramri min khamsak a, tawng hrang, ze hrang min neihtir a. Pathianina min pek kan ram hi kan humhalh zo lo a, kan hnam ziarang kan bosal zel a nih chuan tu mawh nge ni chuang ang le? Kan hnam zia, kan culture leh kan tawng te hi keimahni hian kan ngaihhlut loh chuan tu dang mahin min ngaihhlutsak lo ang. Mahni hnam zia mausau a, mi hnam zia ngaisang ringawt tur pawh kan ni bik lo. Hnam dang tih dan entawn a, ngaihsan bera neih ringawt tur pawh kan ni lo. Kan hnam nunah hian thil tha tam tak a inbilh a, chung thilte chu kan hai chhuah thiam a, kan chawi san zel hi a tul a ni. Chuti ni loa mahni hnam thilte aia hnam dang thilte kan dah san a, Sap tih dan emaw, Korean tih dan emaw kan ngaihsan zawk chhung chu kan chim chin hi a sang tak tak ngai lo ang.

Israel-te chuan an hnam nun zia an chawi sang a, an vawng nung tlat a, hman ropui takah an in din thar leh ta. Kan hnam nun chawi sang chung hian doctor thiam tak, engineer thiam tak, Professor chhun awm tak a nih theih asin. Mi ropui, hnam ropui ni tur hian hnam dang an kher a ngai lo ve. Zo tak chung hian rilru sang tak kan pu thei a, hnam ropui tak pawh kan ni thei.