Aizawl : Nimin khan Mizo national Front chuan Mizo Hnam Runah ‘Lawmluh Special Program’ an hmang a, he hunah hian Vice President Lalthlengliana chuan mi thar 120 lawmluhna a nei a. Lawmluh te hi Chawlh-hmun leh Tuivamita ZPM hruaitu pawi-mawh te niin an thuchhuak chuan a tarlang a, an zingah hian pensioner pasarih (7) an tel. 

Mi thar lawmluttu MNF Vice President Lalthlengliana chuan, “Mizoram politics bih-chian a pawimawh. Mi thusawi atanga ngaihdan siam mai chu thil fel lo a ni. India ram thlirin - Parliament seat 530 chuangah INC in seat 50 chauh an nei a. Delhi khawpuiah seat lak an nei lo. Sonia a upa ta a, tunah hian leader mumal an nei thei ta lo," a ti.  

MLA 34 atanga MLA 5-a tla, Nano car-a leng tawk lek MLA nei. AMC inthlana 2wheeler-a leng tawk chiah Councillor nei Congress chu an zu zawrh vanga hetiang dinhmuna dingah a puh. 

Serchhip by-election tur chungchang MNF Vice president chuan, ZPM leader Lalduhoma chuan dan a bawhchhiat thu leh MNF MLA 12-ten an hek nia sawi chu, "An hek a ni lova, India danpui vawnghim tura intiam an nih angin thutiamah an ding zawk a ni," a ti. 

Lalduhoma chu a chenna bial chhunga mipuiten an hriatchian tawh avanga hetiang zat MNF-ah an lut niin a sawi a, MNF-a a awm lai pawha anmahni nek chep thin tu niin a sawi. Party tan rinawm bera a inchhal ni-ah vek MNF 'N' a din nghal niin a sawi bawk.

MNF vice president hian, "Kan ram politics hi bihchian a ngai tak meuh a. MNF chuan ram leh hnam tan thisen chhuakin thangthar lo awm zel turte tan hma a hruai a. Vawiin thlengin kan hruaitute hian independent kan la duh ber. Kan mipuite ngenna avangin inremna kan siam mai zawk a ni. Kan ram tan kan bei zel dawn," tiin, "Hmanni lawka an pastor chhuan ber tawngkamte kha Mizoramin kan la hriat ngai loh a ni. Mizoram hi milemin an hruai kan remti ngai lo ang," a ti bawk.