Aizawl : New Delhi a neih Central Advisory Board of Education (CABE) meeting -ah School Education Minister Lalchhandama Ralte chuan, “Rampumah tawng pakhat hman a, chumiin hnam tlem zawkte tawng luah lantir zawnga hmalak chu engti kawng pawha pumpelh a tul a ni," a ti.

Nimin khan New Delhi-a Vighyan Bhawan-ah Central Advisory Board of Education (CABE) meeting neih a ni a. Hetah hian Mizoram sorkar aiawhin School Education Minister Lalchhandama Ralte chuan thu sawiin, "National Education Policy 2019 ah India hnampa in a lo mitthla ang thil pawimawh leh a tum zawng zawngte chu India ram zirna kalphung laipui a ni tur a ni a. India Danpui Eight Schedule-a tawng 22 pawm tawh bakah hmun hrang hrang, a bikin India hmarchhakah tawng hlawm lian tak tak a awm a ni. Rampumah tawng pakhat hman a, hnam tlem zawkte tawng luah lantir zawnga hmalak chu engti kawng pawha pumpelh a tul a ni, ” a ti.

Minister chuan Mizorama elementary school a Hindi zirna thar thawh leh nan Hindi teachers 1305 te hlawh pe turin sorkar laipui tanpuina a ngen a.

Hmun kilkhawra Elementary leh Secondary school ah te zirtirtute chenna tur quarters ngaihtuah ngai thu te, MHRD in RMSA scheme kaltlanga teachers quarters sakna tur a pek avangin quarters 282 sak zawh tawh avangin lawmthu a sawi a ni.