Aizawl:Chief Minister Zoramthanga chuan, "Hnam thinlung put hi ram hung nan, kan him nan a pawimawh a. Ramin hun khirh a tawn changin a lo fiah zual thin a ni," a ti.

Mi Zirlai Pawl (MZP) in Zirtawpni kalta zana Remna ni 2023 puala inkhawm, Vanapa Hall-a neih a hmanpuinaah he thu hi sawiin Chief Minister Zoramthanga chuan, "Remna thuthlung ziah zan tluka mipui an hlim leh lawm kha Mizoramah sawi tur a la awmlo tia sawi thin a ni a. Hun kal zelah erawh chhan hrang hrang avangin remni ni pawimawhna a lo chul zel a. Tun hnu ah erawh Remna Ni pawimawhna chuai tan tawh leh hnam thinlung uai thla rawn nawrkang tute chu thangtharte, zirlai te, kan thalaite an ni," a ti a. "Remna nei tura kalkawng biboh tak leh harsa tak te, thil thleng tam takte chu sawi zui a hlawh loh emaw, ngaihpawimawh a nih loh chuan kan history a thil pawimawh tak chu engmah lovah a chhuah theih a ni," tiin thahnemngai taka thangthar ten hnam chanchin leh hun kal tawh a thlir let a an hriatthiam theih tura ruahmanna an siam chu ropui a tih thu a sawi bawk.

MZP buatsaih Remna ni lawmna ah hian MZP President Lalnunmawia Pautu chuan thu a sawi bawk a. Inkhawm hi Vice President Andrew F. Lalramnghaka huan kaihruaiin General Secretary Jacob Lalmuanpuia hnen atangin report ngaihthlak a ni.