Aizawl May 9, 2023 : Mizorama a vawikhatna atan Labour, Employment, Skill Development and Entrepreneurship Department (LESDE) buatsaihin Mizoram Mega Job Fair 2023 chu a vawiin khan ni hnih chhung awh turin Millennium Center Rooftop ah Dy. Chief Minister Tawnluian khuallian niin a hawng. He fair-ah hian hna 1800 chuang chhawpchhuah a ni.

LESDE Director Angela Zothanpuii, MCS chuan he Job Fair chungchang hi sawifiahin LESDE hnuai scheme pahnih SANKALP leh Model Career Center (MCC) te tangkawpa buatsaih a nih thu a sawi a. LESDE chungchang leh an hnathawh te sawifiahin LESDE Deptt. hnuaiah hian hna hlawm hnih Labour & Employment leh Skill Development and Entrepreneurship ten thalai te tana hna peng hrang hrang a thawh te a sawifiah a. He Mega Job Fair ah hian ram pawn leh ram chhunga Company ten heng Sector ; Financial Institutions, Banking, Healthcare, Services, Automobile, IT, FMCG, Tourism & Hospitality, Beauty & Wellness etc. sawmkhawmin Mizo thalai hna zawnglai te tan hnathawh tur 1800 chuang an rawn chhawpchhuah sak thu a sawi bawk a. Tin, he fair ah hian EMPEX portal a hna zawnglai te in ziahluhna hun hawn nghal a nih thu a sawi bawk a ni.

He Job Fair a khuallian Tawnluia, Dy. Chief Minister chuan he programme chhim tura lo kal zawng zawng te chungah lawmthu a sawi a. LESDE Deptt. hi tun hma chuan Labour & Employment tih chauh a ni a, tunah Skill Development leh Entrepreneurship a tel ta hi lawmawm a tih thu leh Mizoram thalai te tan hmasawnna lian tak a nih chhoh dawn thu a sawi bawk. He Deptt. in a lo buatsaih tawh thin kumtira PUM Innovation Fair-a Chief Guest a nih khan thalai tam tak ten an thiamthil ngei mai hmanga intihsiakna an neih te tha a tih thu leh thalai ten mahni kutkawih ngei hmanga mahni in tundinna tur an zawng hi hmasawnna nasa tak a nih thu a sawi. He Department hi Department te angin lang mah se, sum thawhchhuah kawngah leh thalai te tan nasa takin hna an thawk tih sawiin thawktu te pawh thalai te rilru pawh thiam tak an ni a tih bakah LESDE tih hming kan lam chho hi changkanna leh hmasawnna chikhat a ni tih a chiang bawk a ni.

LESDE Deptt. Secretary Lalramsanga Sailo, IRS in welcome speech sawiin he job fair hi thalai hna zawnglai te tan leh hnathawktu tur zawng ten inremsiamna tha a lo neih theih nana buatsaih a nih thu a sawi. LESDE Deptt. hi thalai te tana ding tlat a nih thu leh thalai te thiamna hi eizawnna tlaka tihpunna kawnga puitu an nih thu a sawi a. He event pawh hi chutiang lam zawnga buatsaih a nih thu sawiin, kan thalai te talent inthup hrang hrang te hi rawn haichhuak turin company rawn kal te hi a fuih bawk a ni.

LESDE Deptt. chuan thalai hnazawngten he Job Fair hi hmang tangkaia lo chhim vek turin an sawm a ni.