Hnathawkte state pawn chhuah tam loh vangin Covid vei an tlem

Admin - Jun 06, 2021

Zirlai leh private sector-a hnathawk tam tak ten state pawn an la pan loh vangin harsatna nasa zawk thleng tur a ziaawm

Aizawl: India ram khawpui hrang hranga Mizo awmten Covid-19 hripui leng thawh hnihna vanga harsatna nasa tak an tawh hnuin, an dinhmunin ziaawm lam an pan mek a, zirlai leh private sector-a hnathawk tam tak ten state pawn an la pan loh vangin harsatna nasa zawk thleng tur a ziaawm phah nia hriat a ni.   

India ram khawpui thenkhata Mizo welfare hruaitute hnen atanga ZALEN thudawn danin, Bangalore-a Mizo awm zingah Covid-19 hripui kai mi 132 an awm tawh a, enkawl dam mi 98 awmin, hri vei mek mi 33 an la awm a, damdawi ina enkawlte awm bawk mah se a tam ber chu home isolation-a inenkawl an ni. Bangalore Mizo Association-a Secretary R. Laldintluanga sawi danin tun dinhmunah chuan Bangalore Mizo zingah hri kai an awm belh lutuk tawh lo.

Calcutta Mizo Welfare hruaitute chuan Mizo zingah Covid-19 hri kai mi 60 vel an awm tawh thu leh Covid-19 vanga thi Mizo pali an awm thu an sawi a, tun dinhmunah chuan Mizo zingah hri kai an awm rih lo tih an sawi. Zirlai leh hnathawk tura kal an la tam loh avang leh harsatna tawk tur nia inngaite Mizoram lamah an haw zel avangin nikum lam lockdown aiin buaipui ngai an tam lo tih Calcutta Mizo Welfare President Rev. JC Lalramliana chuan ZALEN a hrilh. 

Health Minister Dr. R.Lalthangliana leh Mizo welfare hmalaknain West Bengal Home department-in, Mizote harsatna buaipui tur Nodal officer, West Bengal Police Service Officer pakhat tun hnaiah a ruat thar a, Mizote tan a thlamuanthlak hle tih Rev. JC. Lalramliana chuan a sawi.

Mizo Welfare secretary PC Michael Lalrinkima sawi danin, Chennai lamah chuan Mizo zingah Covid-19 kai mi 59 awm tawhin, hri vei mek mi 22 an la awm a, zirlai leh hnathawk tura Chennai pan an la awm mang lo a, hemi avang hian Covid vanga harsatna tawk tam berte chu hna nghet thawka awmte an ni.

India ram khawpui, Delhi-ah pawh Mizo zingah Covid hri kai thar an awm tawh mang lo a, hetihlai hian Delhi chu hri kai tamna a nih vangin Mizo zinga hri kai zat hriat mai a harsa tih Mizo Welfare Association president R. Lalremruata chuan ZALEN a hrilh.

Welfare hotuten an buaipui tam berte chu hna nghet thawka awmte an ni a, zirlai leh private sector-a thawk tur Delhi pan an la tam loh bakah, a awm sate pawhin Covid 2nd wave tan tirh lamah Mizoram an pan hman hlawm vangin harsatna nasa zawk tawk an tam loh phah tih R. Lalremruata chuan a sawi.

Mumbai Mizote zingah pawh Covid-19 vanga harsatna thlengin ziaawm lam a pan tih Mumbai Mizo Association hruaitute chuan an sawi a, tun hnaiah hri vei mi 55 chhinchhiah an awm a, tun dinhmuna hri vei inenkawl mek mi 10 vel zingah pawh ngaihtuahawm an awm lo. Mumbai Mizo Welfare hruaitute sawi danin, kuminah lehkha zir tur leh hnathawk chhunzawm tura Mumbai pan Mizoram atangin an la awm mumal lo.

ZALEN-in a biak India ram khawpui hrang hranga Mizo Welfare/Association hruaitute chuan Covid vanga harsatna tawk Mizote chu lockdown karah an theih ang angin an chhawmdawl tih an sawi a, chung tanpuina an pekte chu mi inphalte hnen atanga an dawn khawmte a ni hlawm. 

Share now