British lal tupa nupui a nih hma khan film eng emaw zat a lo chang ve tawh a, sexy tak takte pawhin a lo inlan ve tawh thin a nih kha. Prince Harry nen an inneih hnuah erawh engkim a danglam zo a, a chet velna zawng zawngin ngaihven a hlawh zual ta a ni. 

Hetiang karah hian British lal chhungkua atangin an inla hrang a, Canada-ah an pem zui ta nghe nghe - tunah chuan California-ah an khawsa tawh. Mi pangngaite nun dan anga hun hman an duh a, tunah phei chuan Hollywood hial an sawi ri leh ta. 

Kum 41 mi Meghan Markle hian tun hnai khan Hollywood agency WME nen inremna an ziak a, hei vang hian lemchan lamah hun a hmang leh dawn nia sawi a awm mek. 

WME hian Meghan leh Harry te nupa company Archewell Productions an enkawl ang a, programme an tichhuak dawn. Archewell Productions hi kum 2020-a din kha a ni. 

Megan leh Harry te hian Netflix an thawhpui mek bawk a, kum 2022 khan documentary an lo tichhuak tawh a ni.