Aizawl: Mizoram Nursery Owners Association chuan thlai tiak supply chungchangah Horticulture Officer thenkhat te chu hleih neia thil ti thinah an puh. Nimin khan Nursery neitute hian Sairang Sihhmui a Nursery ah Press mite kawmin Horticulture Department Officer thenkhat chu an chhungte leh thian hnaite hminga firm siamin chumi hmang chuan thlai tiakte an supply thin niin an sawi a. A tak taka hna thawktute chu ngaihsak an ni lo nia sawiin, “Chhungkhat leh thiantha induhsak nan Nursery an hmang hi kan duh lo va. Hetia department officer ten thil an tih avang hian kan tan leirem rah ngaihna a awm lo a ni,” an ti. Nursery neitute chuan thlai tiak supply tur chu department lamin an sawilawk duh ngai lo nia sawiin thlai tiak supply tur an lo inrin ve thin pawh an thlak thin avangin an thlai tiak neihsa pawh supply thei lovin an awm thin tih an sawi a, sum tam tak an seng thlawn tih sawiin hetih lai hian tender chhang lova thlai tiak supply pek an awm niin an sawi bawk. Mizoram Nursery Owners Association President Augustine Lalhualhima chuan sawrkar laipui atangin kumtin kuthnathawktute tihhmasawnna atan pawisa vaibelchhe tam tak a lokal nia sawiin hengte hi department officer thenkhatte chuan an chhungte leh thian thate thurualpuiin tun hnai thla 2/3 chhung lekin thlai tiak tam tak an supply niin a sawi a. Heng nursery-te hi an license cancel a nih hma chu an nawr zui zel dawn tih sawiin tun hnaia thlai tiak supply anga an sawite pawh an supply ngei em tih pawh a chiang lo niin a sawi bawk. Zawhna chhangin Nursery neitute chuan an thlai tiak chu a chi Horticulture department atangin an la thin tih an sawi a. Department lamin a rep char avangin an Nursery pawh a tha thei lo niin an sawi. Tun dinhmunah Mizoram pumah nursery nei mi 68 awmin heng zinga 26 chauh a dam (valid) niin Press mite an hrilh bawk.