Aizawl: Lunglei High Powered Committee chuan Tlabung kaltlangin a tam thei ang ber Bangladesh ah Iskut thawnchhuah tumin hma an la mek.

Lunglei High Powered Committee (HPC) Vice Chairman Lawmawma Tochhawng MLA chuan Lunglei district tan chuan Tlabung kaltlanga insumdawntawnna chu a tlawmin an chhawr ber tur a ni tih a sawi a. “Tlabung border trade hi a taka kalpui a nih hunah chuan Bangladeh atangin bungrua chi hrang hrang a lo lut dawn a, keimahni lam atangin thawn chhuah ve tur kan ngaihtuah a ngai a. Lunglei leh a chhehvelah hian Iskut hi a tha duh em em mai a, Bangladesh lam hian an duh em em mai si a. Chuvangin a tam thei ang ber thawnchhuak turin tan kan la mek a ni,” a ti. HPC Vice Chairman chuan lawng hmanga thil phurh chu a man a tlawm ber tih sawiin a bikin Lunglei district chuan Tlabung kaltlanga insumdawntawnna chu an chhawr hle dawn niin a sawi bawk.

HPC hian artui a intodelh nan hma an la mek bawk a. AH&Vety, Horticulture leh Agriculture te nen tangkawpin ar tui tam chi vulh leh archaw man tlawm zawka mipui ten an lei theihna turin hman an la mek a. He ruahmanna hnuaiah hian AH&Vety department kaltlangin nuai 83.37 sengin ar note 10,000 chu Lunglei khawpui chhunga Poultry Cooperative Society panga kaltlangin chhungkaw 100 hnenah sem a ni a. Ar vulhtute tharchhuah artui hralhna hi May ni 18,2020 khan neih a niin hemi ni hian artui 5000 vel hralhchhuah a ni.

Hei bakah hian Agriculture department nen tangkawpin Dawn, Thiltlang leh Ramthar (Lunglei) a vaimim chingtute tharchhuah chu archaw atan quintals 66.26 leisak a ni a, hemi atan hian nuai 2.10 sen a ni bawk. Nikum chhung bik khan loneitute hnen atangin vaimim malsa quintals 84 lei a niin thil dangte nen chawhpawlh anih hnuah ar vulhtute hnenah kg khat Rs. 35 in hralhchhuah leh a ni a, hriattheih chinah quintals 123 hralh tawh a ni.