ZALEN Nov. 6. 2024; Nimin khan Kolasib Fast Track Court chuan hreipui a a unaupa chek hlumtu, Lalthakima (34) Lungmuat, Kolasib District chu dam chhung lung-ina tang turin a hrem.

November ni 10, 2020 chawhnu dar 1:15 khan Lalrammawia, kum 53 mi chu a chhun mu lai a nau Lalthakima chuan hreipui in a chek a, ka pawh chhawn lovin Lalrammawia hi ama khumah a thi nghal a ni. An unau pahnih hi inngeih lo tak niin, ni dangah pawh an lo inhau in, an intibuai fo tawh thin ni a sawi a ni. He thil thlen lai chiah hi hmutu awm lo mahse, an inchhunga pa ber thuthlengsei a mu zal chuan an thawm ri hi hria-in a harh a, khum lam a’n en chuan a fapa upa zawk chu ama khuma thisen bual zuih khawpa lo awmin a bul maiah a nau chuan hreipui a lo la keng a va hmu a, thil awmzia an han en chian chuan a fapa upa zawk chu a lo thi fel der tawh a ni.

Tualthattu Lalthakima hian Magistrate hma-a a inpuan dan chuan, kha thil thlen ni chawhma lamah khan a u nen an inhau buai a. A u chuan kutte thlakin a hnek a, nimahse an chenpuite’n an thelh avangin intibuai zui zel lovin an awm. Chawhnu herah chuan a u mutna lamah va kalin a u chuan silaia kah a lo tum ni a sawiin an bul mai a hreipui awm chu chuhin a chek ta mai niin a sawi.

Tualthattu hi tunah Kolasib District Jail-ah a tang mek a. Judge Pu R.Vanlalena chuan he thubuai hi nimin (5.11.24) khan rel zovin tualthattu Lalthakima chu Lung-ina dam chhung tang turin a hrem ta a ni.