- Johntea Pachuau, Chanmari, Aizawl Tunlai kan Zoram khawvel han thlir hian ram chhung hmun tinah Pathian kan au nasain Pathianah harh tharna pawh kan chang nasa hle niin a hriat. Kohhran tin mai an hlimin an lam mup mup a, inkhawm boruak pawh a nuam tlangpui vek a ni. Pathian Biak Ina Pathian biak mai pawh duhtawk lovin fianrial tawngtaina nei thawm leh khawlai a mipui authawm hriat tur a tam em em a. A phur zualten khawlai fangin, “Zoram tluanah Isua Krista, Lalber rawh se,” tih te, “Indona chu Lalpa indona a ni a, hnehna chu Lalpa ta a ni, Halleluiah,” tih te, “Setana chu hnehin a awm ta” Etc. tia authawm hriat tur a awm reng a. Kan hriat phak ve chinah tun ang reng reng a Zoram Kristiante harh nasat hi a thleng khat hle. Pathiana harh tharna kan chan chhan ber nia lang chu mi tam takin chhungte tihluihna tel lovin keimahni duh thu ngeiin Kelkang khaw harhna kan chhim a, chuta tang chuan mak tak maiin harhna hi kan chungah alo thleng ta a ni. Camping-a speaker leh councellor-ten inhlan ve thei lovin min councelling rawn a, thar lo pui thar anga kan inhlan ang hi Kelkang harhna hi chuan a keng tel lo va, mahni duhthlannaa Isua pan kan nih avang hian a tlo pawh a tlovin a daih reiin a rinawm. Hei aia nasa hian Kelkang harhna hian kan ram chhungah rah tha a la chhuah deuh deuh dawn ni pawhin a lang. Zoram mipui nawlpuiin harh tharna kan chan sup sup lai leh, harh tharna chan beisei a mahni duh thu ngeia Kelkang pan ni tin a za tel tehmeuh an inzui nguah nguah lai hian Pathian zawlnei thlarau chang chhah bika inngaiten kan hnam, kan ram awm dan tur an lo hrilhlawk ve bawk a. Kan ram Zawlneiten an au chhuahpui tam ber chu, Zoramin hremna a hmachhawn tur thu, Zawlnei tupawh tlangau hla a ni ti ila kan sawi sual tam awm lo ve. Zoramin hremna a hmachhawn tur hrilhlawkna hi Pathianin kan inlam let avang hian min ngaidamin Zoram hian hremna pumpelh ta ni ila, Zoram chhiatna lo hrilhlawktute hi a mihring tak pawhin an thin hi a rim viau ang em? Tin, hremna hmachhawn tur min pumpelhtirtu Pathian chungah pawh vui hmui an pu mai lo vang maw? Hrilhlawkna thu hriltute hi chuan an hrilhlawkna ang hi thleng dik vek se, Pathian nena kan inkar thatzia hi mipuite hian an mit ngeiin hmuin hria se tih hi an duhthusam a ni ngei ang. Mahse, an hrilhlawkna hi lo dikin Pathian hnen atanga an dawn tak tak pawh nise, Pathianin Ninevi khawpui a ngaihdam ang khan min ngaidam thei a ni tih hi i hria ang u. Pathian hian amah ringtute hrem ngawr ngawr hi a tum a ni lo va, min hmangaih em avangin leh ama siam kan nih avangin a thuawih turin min duh a, a thu kan zawm lohnaah min zilh thin zawk a ni. Zawlneiten hrilhlawkna hi lo puang tawh pawh nise, hrem a tum vek tawhte hian inlamlet a, a lam kan hawia ngaihdam kan dil chuan min tihboral hi a tum a ni lo. Zahngai thei tak Pathian a nih vangin. Pathian zahngaihna nasatzia hi Jona 4-ah a inziak. Mihringte chunga khawngaihna nasa tak a lantir thin thu a sawi a, hei hian Pathianin zawlneite hmanga thu a lo sawi tawh pawha zahngaihna avangin a sut leh thei a ni tih chiang takin a tilang. Mihringte hi khawi ram leh khawi hnam pawh hian thil tih dan leh chin dan kan nei vek a. Kan chin than loh leh kan tihngai loh angah pawh kan mi ngaihsan zawng leh kan chung ente chin dan a nih chuan anmahni entawnin an tih ang kan ti ve mai thin. Pastor Chhawna leh Evan. Chawngkhupa?etc te hun lai atang khan, ‘Zoram hian India rama Kristian ram awmc hhun kan nih avangin Pathianin malsawmna tam takin min vur dawn a, kan ram hi India rama ram ropui ber pawlah min la siam dawn a ni’ tih hrilhlawkna lo sawi ni zawk ta sela chuan tunlaia kan ram zawlneite thusawi, kan ram chhiatna tur an sawi sek hi a danglam ang em? Mizo zawlnei ropui tak, Pastor Chhawna hrilhlawkna, Zoramin thim thuah hnih a hmachhawn tur thu hrilhlawkna rapthlak tak mai hi?kan tunlai zawlnei tam takte hian a lo thleng lo vang a, a zuzi mai ang tih an hlau hle niin a hriat a. Sawi nuam an tiin Zoram hi Pathianin min hrem ngei ngei se tih rilru pua sawi chhuak thin nge an nih ang, Zoramin thim a hmachhawn tur lak ata Pathian hnena ngaidam dila he thim lo thleng tur hi kan ram, kan hnam min pumpelhtir tura Pathian hnena tawngtai thin kan nih zawk le? Pastor Chhawna inlarnaa Zoramin thim thuah hnih a hmachhawn tur thu a sawi, thim thuah khatna chu kan hmachhawn tawh niin an sawi thin a. Chu chu Zoram buai kha niin thil chik mite chuan ansawi thin. Pastor Chhawna hnena Pathian thu lo thleng zinga hremna hnuhnung zawk thim thuah hnihna chu kan la hmachhawn lo niin a hriat a. Pathian hian thim thuah hnih kan hnam hremna tur atan a lo ruat diam tawh hi min tawrhtir lovin min lo ngaidam daih tawh pawh a ni thei. Kan sualnate hriaa kan inlamlet a nih chuan kan Pathian hian thim thuah hnih lo thleng tur hi a thlentir lul lo vang. Zawlneite hrilhlawkna a nih avang hian thleng ngei ngei tura huaisen taka sawi chi a ni lo. A zahngaihna avangin ngaihdamna kan chang thei a ni. Kan tunlai boruak nena thlir phei chuan thim thuah hnih lo thleng tur laka ta hi Pathianin min ngaihdam ngei pawh hi a rinawm. Amah ringtu baal hmaa thingthi ngai lo tam takte hi kan Patian hian min khawngaih lo vang em ni? Pu Chawng-khupa pawhin Aizawl chhiat tur thu a sawi an ti a, chu a thilsawi nia an sawi thin chu, “Chanmari atang Bawngkawn a lang tih te, Chanmariin Biak In rei tak an sa ang a, an sak zawh hunah chhiatna a lo thleng dawn,” tiin a sawi an ti a, tak tak a ni nge ni lo finfiah a har tawh hle. Pu Chawngkhupa khan he hrilhlawkna hi Pathianin lo puantir pawh nise a hunlaia Pathian kan tih thinurna avanga kan Pathian thil tum kha Lalpan kan khawlohna te avanga ngaihdam kan dil avangin min ngaidam thei a, hrilhlawkna a lo puantir tawh hi a sut leh thei a ni. He hrilhlawkna hi Pu Chawngkhupa khan a lo sawi tak tak a nih chuan Pathianin a puantir tih hi rinhlelh rual a ni lo. Mahse, ngaidam theitu leh thinnel tak Pathian a nih avangin Pathian hian he hremna kan chunga lo thleng tur lak ata hi min ngaidam ta niin a lang. Zahngaihnaa khat Pathian a nih avang hian kan Pathian hian kan ram chhiatna tur laka ta hi a zahngaihna a van lantir nasa tawh tehlul em! Nikum hmasa lawka Thlipui na tak ‘MAHASEN’ kan rama lo thleng ngei ngei tur nia TV lamah leh chnchinbu lamahte uar taka an sawi, a rim ara pawh hre lova min pumpelhtir dan te, Lirnghing na ber Zone 5 thlen theihna ram ni chung sia Zoram kan luh tirh atanga tun thlenga Lalpa zahngaihna kan chan avanga lirnghing hlauhawm dan pawh ngaihruat thiam lova kan la awm theite hi a van makin, kan Pathian hian a mite min kalsan lo va, kan ram chhiatna tur lak ata min humhim a ni tih hi a van tichiang tehlul em! Chuvangin, Pathian zawlnei, Pathian mi hman tam takte hian kan ramin chhiatna a hmachhawn tur ringawta Zoram mipuite min sawi thaih reng lo hian kan ramin Pathian hremna kan hmachhawn tur lak ata Lalpa hnena ngaihdam kan dil avanga Pathianin min ngaihdam tak thu te, kan Zoram chhiatna tur lak ata kan Pathian hian a thu kan awih chuan min la ngaidam zel dawn a, Kristiante tan chuan hlauh tur reng reng hi a awm lo a ni. Chawlhna nuam Isua hnen kan thlen hma chuan tiin Zoram mipui, kan ram chhiatna lo thleng tur kan sawi avanga hlauthawng reng renga hun hmang mekte leh lungngaia kun mekte hnenah hian a êng zawnga Pathian thu kan sawi hi a van hun tawh em! Pathian kan rinna kawnga hlimna leh thlamuanna kan neih belh theihna tura Pathian thu sawi thin kan nih chuan Zoram Kristiante nunah hian thlamuanna leh hlimna famkim hmuh theihin a lo awm ang a. Kan nunah kan biak thin Pathian a rinna kan nghahzia a lo lang chhuak ang a, ringlomi tam takte pawhin kan Pathian hi Pathian nung a nihzia nasa taka hrilh ngai lovin kan nunah an hmu ang a, Lal Isua ke bulah ringlomi tam takte hi kan hruai thleng tawh zawk dawn a ni.