Aizawl: Mizoramah Covid-19 vanga thi mi 257 an awm tawh a, hrikai tawh zawng zawng mi 78067 atanga chhutin thi hi 0.32% a ni.

Zirtawp zanlai dar 12:55 khan C. Vanlalsiama (62), Dawrpui chu Covid-19 vangin ZMC ah a boral a. Sept. ni 11 khan hri a kai tih hriatchhuah niin, hemi ni vek hian admit nghal a ni. Lalhnuna (62) Electric veng chu nimin chhun dar 12:15 khan ZMC ah a boral a, Sept. ni 12 khan hri a kai tih hmuhchhuah a niin hemi ni vek hian admit nghal a ni.

C.Vanlalhruaia (62), Venghlui chu nimin chawhnu 1:30 khan ZMC-ah a boral a, September ni 16 khan hri a kai tih hriatchhuah niin hemi ni vek hian admit nghal a ni.

Tun dinhmunah hrikai hi Aizawl district ah 9030 an awm a, Lunglei-ah 917, Siaha-ah 1072, Champhai-ah 556, Kolasib-ah 588, Serchhip-ah 546, Lawngtlai-ah 844, Mamit-ah 510, Khawzawl-ah 131, Hnahthial-ah  84 leh Saitual-ah 17 an awm.