March 30, 2022; Champhai Venglai ah buhfai lem (plastic pawlh) nia hriat chu tukin khan hmuh chhuah niin, heng buhfai te hi Food safety, Dorectorate of Health Services ah endik turin hmalak nghal a ni a, dawr a zawrh te pawh hralhchhuak tawh lo turin hmalakna a awm nghal nia thudawn a ni.

ZALEN thudawn danin, Champhai Venglai Presbyterian kohhran KTP Ruby jubilee lawmna kal mekah tukin khan an kohhran Pavalai te ruai siamin an fatu a, tuakthuan ei tur Champhai khawchhung dawr pakhat atanga an lei buhfai chu belpui ah chhumin, plastic nia hriat te chu an rawn lang a, a hmin leh hmin loh an enna ah pawhfan theih a nih hial avangin plastic a nih ngei rin a ni. 

Hemi vang hian buhfai an chhum chu ei chi ah an ngai lo a, buhfai pangngai karah plastic nia hriat hi pawlh a nih rin a ni. Cooker a chhum chuan a hriat hran theih dawn loh avangin mihring hriselna atan a him lo dawn hlein an hria tih thudawnna chuan a sawi.

Buhfai bag ah hian 'Suraj' tih inziakin, 'Premium Grade Rice' tih a chuang bawk a, bag khat Rs. 1,450 man niin, Champhai khaw chhungah heng ang buhfai hi zuar an awm nual nia hriat a ni a, Mizoram hmun dangah pawh zuar an awm ngei rin a ni.

Pavalai te hian an chhum bak zawng chu an leina dawrah an thleng leh a, an hriat danin, Silchar lam atanga lakluh a ni.

Hemi chungchangah hian Champhai Legal metrology hotute chuan complaint an dawn thu leh buhfai te chu Food Safety, Directorate of Health Services ah endik tura thawn turin an ruahman thu ZALEN an hrilh a, buhfai pawh an endik nghal thu te, heng ang buhfai, dawrkai ten an zawrh te pawh hralh chhuak tawh lo tura hma an lak nghal tur thu an sawi.