May 14, 2024; Mizoram Board of School Education (MBSE) chuan vawiin chhun dar 12 khan High School Leaving Certificate (HSLC) Examination 2024 result a tichhuak a, zirlai exam 18,561 zinga 13,618 an pass a, pass percentage 73.37 niin nikum (71.14%) aiin an pass tha.

HSLC 2024-ah hian a pumpuiah St. Paul’s Higher Secondary School zirlai Lalmoipuia Lawmzual s/o HL Lawmzuala chu pakhatna a ni a, top 10-ah mi 14 awmin, zirlai exam zingah mipa aiin hmeichhia an tam a, pass zingah pawh mipa aiin hmeichhia 744 in an tam zawk.

Kumin HSLC Examination-ah hian exam hmachhawntu zirlai 18,561 zinga 18,213 chu regular student niin, 348 chu private-a exam an ni a; regular-a exam zingah 13,477 (73.99%) pass in, private candidate 348 zinga 141 (40.52.95%) an pass.

Zirlai pass zawng zawng 13,618-te chu hmeichhia 7,181 leh mipa 6,437 an ni a, pass percentage-ah hmeichhia (72.48%) niin, mipa 74.38% a ni.

Distinction ah zirlai 1,332 pass in, first division-ah zirlai 3,801 an pass a, second division-ah 5,564 pass-in, third division-ah zirlai 2,921 an pass a, compartmental chance nei zirlai 106 an awm.

Kumin hian zirlai 4,837 fail in, nikum ah 5,162 an fail a, 2022 ah 4,928 leh kum 2021 khan 2,856 an fail.

Kumin HSLC exam-ah hian zirlai exam zawng zawng pass vekna sikul 85 a awm a, pass awm miah lohna sikul 18 a awm.

Tun hnaia HSLC Examination-a pass percentage zat chu kuminah 73.37%, 2023 ah 71.14%, 2022 ah 70.64%, 2021-ah 82.43%, 2020-ah 68.33%, 2019-ah 67.93%, 2018-ah 76.65%, 2017-ah 72.17%, 2016-ah 71.17%, 2015-ah 68.30%, 2014-ah 67.51%, 2013-ah 58.63%, 2012-ah 72.27% a ni.