May 19, 2023; Mizoram Board School Education (MBSE) chuan vawiin chhun dar 12 khan Higher Secondary School Leaving Certificate (HSSLC) Examination 2023 result a tichhuak a, zirlai exam 14,091 zinga 11,084 an pass a, pass percentage chu 78.66 niin, nikum pass parcentage 82.07 aiin a hniam zawk.

Kumin HSSLC Examination-ah hian exam hmachhawntu zirlai 14,091-te chu regular student 13,917 leh private caididate 174 an ni a; regular-a exam zingah 11,012 (79.13%) pass in, private candidate zinga 72 (41.38%) an pass. Pass zawng zawng zirlai 11,084 zingah hmeichhia tam zawkin, 5,982 an ni a, mi 5,102
chu mipa an ni.

Zirlai pass zinga 809 chu distinction-ah an pass a, first division-ah 3,451, second division-ah 4,269 leh third division-ah 2,556 an pass. Compartmental chance nei zirlai 6 an awm a; zirlai 3,001 an fail thung.

Zirlai pass vekna sikul Arts-ah 54, Science-ah 2 leh Commerce-ah panga an awm. Zirlai fail vekna sikul Art ah pakhat awmin, science ah pakhat bawk a awm a, commerce ah a awm lo.

Arts stream bikah zirlai exam 10,216 zinga 8,003 (78.34%) an pass a, mi 2,212 fail-in, compartmental chance nei 1 a awm. Distinction-ah mi 521, first division-ah 1,985, second division-ah 3,129 leh third division-ah 2,369 an pass.

Science-ah zirlai exam 3,075 zinga 2,389 (77.69%) an pass a, zirlai 681 fail-in, compartmental chance nei 5 an awm. Distinction-ah mi 199, first division-ah 1,224, second division-ah 894 leh third division-ah 72 an pass a ni.

Commerce-ah zirlai 800 zinga 692 (86.50%) an pass a, zirlai 108 an fail. Distinction-ah zirlai 89, first division-ah 242, second division-ah 245 leh third division-ah 116 an pass.

HSSLC Examinations 2023-ah hian Arts stream-ah sorkar sikulah 66.55%, deficit school-ah 90.28%, aided school-ah 87.15%, lumpsum school-ah 78.46% leh private school-ah 86.3% an pass a; private candidate zinga 40.94% an pass bawk.

Science-ah chuan sorkar sikulah 59.51%, deficit school-ah 85.21%, aided school-ah 74% leh private school-ah 83.14% an pass a; private candidate zinga 47.62% an pass. Commerce-ah chuan sorkar sikulah 68.62%, deficit school-ah 92.66%, private school-ah 96.83% an pass a ni.