Aizawl: Indian Council for Child Welfare chuan Mizo naupang pathum Lalramliana, Vanlalfela leh Jolyn Malsawmsanga te chu huaisen lawmman (bravery Award) 2021 dawng turin a thlang.

Indian Council for Child Welfare in huaisen lawmman dawng tura thlan an nih thu hi tunhnai khan Mizoram State Council for Child Welfare te a rawn hriattir a. Kum dangah chuan huaisen lawmman hi India Republic day ah President in New Delhi ah a hlan thin a, mahse kumin ah erawh chuan hripui leng vangin award hlan hun tur hi hriat a la ni lo a ni. Mizoram State Council for Child Welfare thawktute chuan huaisen lawmman dawngtu te hi sumfai leh mdedal hlan an nih bakah New Delhi an kalna, ei leh in leh thlenna zawng zawng chu tumsak an ni thin tih ZALEN hrilhin zirlai an nih chuan pawl XII an zir zawh thlengin an zirna senso zawng zawng hi Indian Council for Child Welfare chuan a tumsak thin niin an sawi. Hriat theih chinah Mizoram atangin tuna huaisen lawmman dawng tur mi 3 tiamin bravery award hi mi 39 in an dawng tawh a, an zinga 12 hi an thih hnua dawng an ni.

Huaisen lawmman dawng tur zinga mi Lalramliana hian a thianpa tuitla a chhanchhuah avanga huaisen lawmman hi dawng tura thlan a ni a. Ni 2.8.2021 khan Lalramliana (11) s/o Lalrinchhana leh a thianpa Joseph Malsawmtluanga (13) s/o Suiliamkhama, New Hruaikawn khua te chu an khua atanga km 1.5 vela hla Kurung luiah mautuai khawrh turin an kal a. mautuai an khawrh zo tuia an cheng chu Joseph Malsawmtluanga hi tuiah a tla a, Lalramliana hian a thianpa chu tuiah a tla tih hriain luiah hian a zuang-lut ve nghal a. A thianpa hi harsa ti taka hnuk-chhuakin a awmah nemin thawk tir leh tumin vawi tam taka a nem hnuah a thianpa hi a lo harhchhuak leh a. A huaisenna leh a remhriatna avangin lawmman dawng tur hian thlan a ni. 

Lawmman dawng tur dang Vanlalfela (10) leh a pa Lalrinthanga Lungrang khua te hi ni 24.11.2020 khan an huanah hnathawkin an kal a. Hna an thawh zawh hian a pa chu chawhmeh zawngin tlangah a lawm chho a, a rawn chhuk lam chu a thingzar vawn chuan dawl zo lovin a lum ta a. A fapa chuan hriain a pa chetsualna lam chu a pan vat a, a pa thi-chhawng lo let reng leh thisen chhuak chu a theihtawpin a buaipui a. A pa awmdan hi zualko kalin an khuaa YMA te a pun hnuah mi tlawmngai te hian Thenzawl damdawi in an panpui a, a pa pawh hi zawi zawiin a tha chho ve hret hret a ni. Vanlalfela huaisenna leh ngaih-tuahna fing tak avang hian nunna chhanchim theih a nih phah a, chuvangin lawmman dawng tur hian thlan a ni.

Lawmman dawngtu tur dang Jolyn Malsawmtluanga hian a thianpa electric in a man a chhanchhuah vanga huaisen lawmman hi dawng tura thlan a ni. Ni 30.11.2020 tlai dar 4-5 inkar vel khan Pukpui Health Sub-Centre a ambulance hluihlawn tawha naupang infiam zinga mi Moses Lalruatfela (11) s/o Zonuntluanga chu electric in a man a. Hei hi Jolyn Malsawmsanga (15) s/o Lalmuankima chuan a nunna thapin chhanchhuah hna hi a thawk a, electric in naupang a man mek hi a chhanchhuak ta a ni.