Mizoram Volleyball Association (MVA) chuan Hunthar Volleyball Club-in tun hnaia mipa Pro Division an chhuahsan hnuah an aiawh turin Sihphir Volleyball Club a hlang kai.

Mipa huang Pro Division-ah hian club paruk an awm thei a, Pro Volleyball League hnuhnung bera champion club hian tun hnai khan season lehah chuan an tel chhunzawm tawh dawn loh thu leh an inhnuhdawh thu an puang a, an hmun a ruak ta a ni.

An hmun ruak hnawh khattu tur ngaihtuah hian Nilaini khan MVA hi thukhawmin May 29-a Pro Division-a kai tur play off khelha pahnihna, Sihphir chu a hlang kai ta a ni.

Aizawl District Volleyball Association (ADVA) chuan 2023-24 season-a an hnuaia club che thate chu an aiawha Pro Division play off-a tel turin MVA-ah an thlen a, play off final-ah khan Sihphir hian Khawbel Volleyball Club chu 3-2 (25-22, 22-25, 26-24, 23-25, 15-12)-a hneh lovin pahnihna an ni a. Pro Division-a hmun ruak a awm takah hian hlang kai an ni ta a ni.

Sihphir Volleyball Club hi club hlun tak niin kum 1991-a din kha ni a, MVA-in ADVA a siam hma atang tawhin club nung tak a ni thin tawh a. 2023-24 season khan ADVA Season Opening Tournament champion niin Season Ending Tournament-ah semi-final an lut bawk.

Fan an nei tha a, Pro Division-a hlan kai an ni pawh khawtlang an phur a, player tha lak luh ngei pawh an tum a ni.

Season lehah chuan Pro Division-ah hian Khawbel leh Sihphir bakah TNT, Tuichangral, Durtlang North leh Chhinga Veng Spikers te an awm dawn ta a ni.