Khawhai hi khaw lian leh hmingthang an ni hauh lo. Mahse, volleyball-ah zet chuan zuam sual awl tur tak an ni. Team 100 chuang telna volleyball tournament mipa final lut thei ngat an ni. Hunthar erawh volley thiam veng tia sawi ngam, Mizoram pum huap pawha hming lang zauh zauh tawh an ni thung. 

D3 Amrit Cement 22nd Inter Branch YMA Volleyball Tournament 2022 mipa final nizana khelh zawh takah set hnih ve ve lain deciding game-ah Hunthar-in 15-13 a Khawhai hnehin a tum thum nan CYMA volleyball tournament-ah an champion. 

R Dengṭhuama Indoor Stadium-a inkhelh hmuhnawm takah hian team hnih te an inhnehtawk a, game boruak sang takah tantu ngah zawk Khawhai lamin bul an tan tha lova, experience nei tha zawk Hunthar lamin 25-21 in set khatna la hram. Set hnihnaah pawh Hunthar bawk chetha leh zawkin 25-19 in set hnihna an la. Khawhai lamin tlawm mai an tum lo, set thumna leh set li-na an rawn la ve leh a, fans an phur thar. Deciding match-ah team hnih te an fimkhur tawn a, Khawhai lamin Hunthar point hmuh an um chho char char a, Hunthar lamin match point an hmuh tawh hnuah Khawhai lamin point thum zet rawn hmu zawn chho mahse an pawttla zo ta ngang lo a ni.

Champion : Hunthar, Rs. 50,000/- Trophy, Medal, Certificate
Runners' up : Khawhai, Rs. 25,000/- Trophy, Medal, Certificate

Semi Finalist : Chhinga Veng & Zawlnuam Vengpui Rs 5,000/- each
Quarter Finalist : Tlangsam, Khawbel, Kulikawn West & Maubawk Rs. 2,000/- each

Best Spiker : Saidingpuia Sailo, Khawhai
Best Setter : C. Laldawngkima, Hunthar
Best Coach : VL Malsawma, Renthlei, Hunthar