Aizawl: Ministry of Home Affairs chuan Hunthar veng lei che thin siamthatna atan vaibelchhe 10 Mizoram sawrkar pek a remti.

Zalen palai zawhna chhangin Disaster Management & Rehabilitation Secretary Lalthangpui Sailo chuan, “Hunthar lei che thin siam thatna atan hian sawrkar laipuiin DPR siam tura min tih angin vaibelchhe 20 senna tur DPR siam a ni a; mahse, a hnuah 15-ah an tihniam a, tun hnai khan Delhi-ah min ko thlain vbc 10.9 turin MoU min sign-pui leh a ni,” a ti.

Hnathawh tan hun tur zawhna chhangin Disaster Management & Rahabilitation Secretary chuan sum hi installmet a pekchhuah tur a nih avang te, fur a la nih avanga hmalak tan a buaithlak hrih dawn avang leh sum hi sawrkar laipuiin a la pek chhuah loh avangin hnathawh tan hun tur a la sawi theih mai loh niin a sawi bawk.

Assembly budget session June 17, 2019-a neihah Disaster Management & Rahabilitation (DM&R) Minister Lalchamliana chuan Hunthar veng lei tlahniam thin chu cheng vbc 20 chuang sengin siam that a nih thu leh National Disaster Management Authority (NDMA)-in May 2, 2019-a a pawmpui tawh thu a sawi a, sanction hmuh ve leh hna tan a nih tur thu a lo sawi tawh a ni.